काठमाडौं । कोरोनाका कारण घरमै बसेको समयमा नयाँ स्क्रिप्टमा काम गरिरहेकाे कलाकार, निर्माता तथा निर्देशक दीपकराज गिरीले बताएका छन् । लकडाउनका कारण घरमै फुर्सदमा बसेको समयमा नयाँ स्क्रिप्टमा कलम चलाइरहेको उनले बताए ।
“लकडाउनबाट बाहिर आउँदा केही नयाँ कन्सेप्ट र विषयमा दुईतीनवटा चलचित्रको स्क्रिप्ट तयार पार्न सके पछि काम गर्न सहज हुन्थ्यो भन्ने सोचले काम गरिरहेको छु,” दीपक भन्छन्, “नयाँसँगै पहिला नै लेख्न सुरु गरेको चलचित्र छक्का पञ्जा ४ को स्क्रिप्ट पनि रिभाइभ गरिरहेको छु ।”
कोरोना संक्रमणको जोखिम कम भएर अवस्था सामान्य भएपछि पुनः स्क्रिप्टमा बस्नु नपारोस् भन्ने सोचले स्क्रिप्टमा काम गरिरहेको उनी बताउँछन् ।
दीपक आफ्नो चलचित्रको स्क्रिप्ट आफैं लेख्छन् ।
यसबाहेक वल्र्ड सिनेमा र त्यसको मेकिङ हेरिरहेको उनी बताउँछन् । “यो समय मेरा लागि सिकाइको समय पनि हो । सिकेर कहिल्यै सकिँदैन । वल्र्ड सिनेमा हाम्रो भन्दा कसरी फरक छ, हामी कहाँनेर पछि छौं भन्ने हेरिरहेको छु,” दीपक भन्छन्, “कसरी पपुलर सिनेमा बनाउने, कहाँ हाम्रो कमजोरी छ भनेर आफ्नै समीक्षा पनि गरिरहेको छु ।”
