एजेन्सी । कोरोना भाइरस महामारीका कारण बन्द रहेको चलचित्र तथा टीभीको छायांकन विस्तारै सुरु हुन थालेको छ । अमेरिकामा करिब दुई महिनाभन्दा लामो समय स्थगित चलचित्र छायांकन पनि अब विस्तारै सुरु हुने भएको छ ।
खबरका अनुसार हलिउडको ठूलो उद्योग रहेको अमेरिकाको प्रान्त क्यालिफोर्नियामा अब चाँडै नै छायांकनको काम सुरु गर्न अनुमति दिइएको छ ।
क्यालिफोर्निया जनस्वास्थ्य विभागले २२ पृष्ठ लामो नयाँ मार्गनिर्देशन जारी गर्दै निर्माणको काम पुनः सुरु गर्न अनुमति दिएको हो । उक्त निर्देशनमा यही जुन १२ तारिखदेखि क्यालिफोर्नियाभित्र टिभी, चलचित्र र गीत निर्माण पुनः सुरु गर्न सक्ने अनुमति दिएको छ ।
तर, निर्माण टिमले सम्बन्धित क्षेत्रमा छायांकन अनुमति भने लिनुपर्ने छ । विभागले यही शुक्रबार मार्गनिर्देशन जारी गर्दै अनुमति दिएको हो । छायांकनमा सलंग्न हुने हरेक व्यक्तिले संक्रमणको जोखिम कम गर्न निर्देशनमा लेखिएको सुरक्षा प्रोटोकलको कडा रूपमा पालना गर्नुपर्ने र आवश्यक परे प्रोटोकल अझै बढ्न सक्ने पनि उल्लेख गरिएको छ । (सीएनएन)
