काठमाडौं । अख्तियार दुरुपयोग अनुसन्धान आयोगले पोखरा महानगरपालिकाका इन्जिनियर शिवप्रसाद बरालसहित तीन जनाविरुद्ध भ्रष्टाचार मुद्दा दायर गरेको छ । सेवाग्राहीबाट उनीहरूले डेढ लाख रुपैयाँ घुस लिएको पुष्टि भएको जनाउँदै अख्तियारले बिहीबार विशेष अदालत काठमाडौंमा मुद्दा दायर गरेको हो ।
अख्तियारले मुद्दा दायर गरेका अन्यमा पोखरा महानगरपालिकाका सबइन्जिनियर उषाकिरण रोकाया र गोदार इन्जिनियरिङ कन्सल्टेन्सी सेवाका सुरज कुँवर रहेका छन् ।
पोखरा महानगरपालिकामा रोकाया र कुँवरसहितले घर निर्माण सम्पन्न प्रमाणपत्र दिलाउने प्रयोजनार्थ सेवाग्राहीसँग घुस मागेको उजुरी परेपछि अख्तियारले उनीहरूमाथि निगरानी बढाएको थियो ।
पोखरास्थित अख्तियारको कार्यालयबाट खटिएको टोलीले २०८० चैत २८ गते उनीहरूलाई सेवाग्राहीबाट एक लाख ५० हजार रुपैयाँ घुस लिइसकेको अवस्थामा नियन्त्रणमा लिएको थियो ।
अनुसन्धानका क्रममा उक्र घटनामा पोखरा महानगरपालिकाका इन्जिनियर बरालको पनि संलग्नता पाइएको अख्तियारले बिहीबार जारी विज्ञप्तिमा उल्लेख छ ।
अनुसन्धानमा रोकाया र कुँवरसमेतको मिलेमतोमा घर निर्माण सम्पन्न प्रमाणपत्र दिनका लागि तीन लाख ५० हजार रुपैयाँ घुस मागेको र दुई लाख रुपैयाँ इन्जिनियर बरालले बुझेको पाइएको अख्तियारले जनाएको छ ।
अख्तियारले दायर गरेको मुद्दामा उनीहरूसँग तीन लाख ५० हजार रुपैयाँ बिगो दाबी गरेको छ ।
