काठमाडौं । कोरोना भाइरस (कोभिड–१९) ले अहिले विश्व नै प्रभावित बनेको छ । नेपालमा पनि आज लकडाउन भएको ठ्याक्कै महिनादिन पुगेको छ । 

कोरोना संक्रमण फैलिन नदिन सरकारले गत चैत ११ गते देशैभर लकडाउन घोषणा गरेको थियो । सरकारले लकडाउनको समय पटक–पटक थप गरी वैशाख १५ गतेसम्म पु¥याएको छ । लकडाउनमा अत्यावश्यक र पासबाहक सवारीबाहेक अन्य साधन सञ्चालन भएका छैनन् । अत्यावश्यक कामबाहेक बाहिर हिँडडुल गर्नेलाई प्रहरीले नियन्त्रणमा लिएर केही समय होल्ड गर्ने नीति लिएको छ ।

लकडाउन कार्यान्वयन गर्न पूरै मुलुक लागेको अवस्थामा पनि केही सर्वसाधारणले अटेरी गरेको पनि पाउन सकिन्छ । सुरु–सुरुमा त लकडाउन कस्तो हुन्छ भन्दै हिँड्नेहरू पनि भेटिए तथापि अहिले पनि विभिन्न निहुँमा घरबाहिर निस्कने क्रम भने रोकिएको छैन । 

उसो त सरकारले नै अत्यावश्यक सामग्री खरिदका लागि बिहान–बेलुकाको समय छुट्याए पनि पसलअघि सर्वसाधारणको घुइँचो देख्न सकिन्छ । सुरक्षाकर्मीहरूले पनि जाँचमा कडाइ गरेकै छन् । 

सर्वसाधारणले आफ्नै लागि लकडाउन घोषणा गरेको भन्दै नसम्झनु यसको मूल कारण मान्न सकिन्छ । उपत्यकाका विभिन्न स्थानमा पुग्दा सर्वसाधारणहरू अत्यावश्यक सामान किन्न भन्दै निस्किएको देख्न पाइयो । हामी काठमाडौंको मरु टोल पुग्दा त सर्वसाधारणको भिड देख्न सकिन्थ्यो । लकडाउनको आज एकमहिना पुगेको छ । सर्वसाधारण कहाँ के गरिरहेका छन्, के लकडाउनको पूर्ण पालना भएको छ त ? लकडाउन सबैले पालना गरौं, हेलचेक्र्याइँ कत्ति पनि नगरौं । हेरौं थप तस्बिर :