काठमाडौं । वर्ष ०७६ चलचित्र निर्माता, निर्देशक तथा कलाकर्मीका लागि सुखद रहेन । बक्स अफिसको कलेक्सन र परिस्थिति दुवैका हिसाबले यो वर्ष नेपाली चलचित्रको यात्रा सुखद् रहन सकेन । वर्षको सुरुका महिना बक्स अफिस कलेक्सन कमजोर हुँदा चलचित्रकर्मीको टाउको दुखाइको विषय बन्यो भने अन्तिममा कोरोनाको कहरले घाँटी निमोठ्यो । 

यो वर्ष दीपेन्द्र लामाको चलचित्र ‘छ माया छपक्कै’ सर्वाधिक ग्रस कलेक्सन गर्ने चलचित्रको सूचीमा अग्रपंक्तिमा रह्यो । दीपेन्द्रले निर्देशन गरेको चलचित्रमा दीपकराज गिरी, केदार घिमिरे, जितु नेपाल र केकी अधिकारी मुख्य भूमिकामा थिए । यो चलचित्र दीपेन्द्रको निर्देशनभन्दा पनि दीपक–दीपाको ‘छक्का पञ्जा’को सिरिजका रूपमा दर्शकले लिएका थिए । 

कलेक्सनका हिसाबले ‘छ माया छपक्कै’ पछि चलचित्र ‘कबड्डी’को तेस्रो सिरिज दोस्रो स्थानमा आइपुग्यो । रामबाबु गुरुङको निर्देशन रहेको चलचित्रले उति धेरै सकारात्मक समीक्षा त बटुल्न सकेन । तर हलमा दर्शक भने बटुल्यो । यो चलचित्रमा रामबाबुले दयाहाङलाई मुख्य पात्र बनाएर चलचित्र निर्माण गरेका थिए । बक्स अफिसमा यसले निर्मातासँगै सिनेमा हल तथा वितरकलाई समेत खुसी दिन सकेको थियो । 

वर्ष ०७६ धेरैका लागि दुखद् बने पनि निर्देशक प्रदीप भट्टराईका लागि भने सुखद् रह्यो । यो वर्ष उनको तेस्रो निर्देशन चलचित्र ‘जात्रै जात्रा’लाई दर्शकले मन पराए । जात्राको सिक्वेलका रूपमा ल्याएका उनको चलचित्रले समीक्षा पनि राम्रै पायो । पैसा पनि राम्रै कमायो । 

उनले ‘जात्रा’ कै कलाकार लिए । तर त्यसबाहेक उनले अर्का पात्र पनि थपे, दयाहाङ राई । उनको उपस्थितिलाई दर्शकले रुचाएको पाइएको थियो । 

प्रदीपको चलचित्र त सफल भयो नै उनी यो वर्षबाट सुरु भएको स्ट्यान्डअप कमेडीको रियालिटी सोको निर्णायकमा पनि मजाले जमे । फलतः उनलाई वर्ष ०७६ फाप्यो । 

वर्षको पहिलो महिना रिलिज भएको चलचित्र ‘दाल भात तरकारी’ पनि यो वर्ष बक्स अफिसमा राम्रै दरिएको चलचित्र हो । किरण केसीले निर्माण गरेको चलचित्रमा मह जोडी मात्रै होइन कुनै समयकी सुपरहिट नायिका निरुता सिंह पनि थिइन् । मुख्य भूमिकामा हरिवंश भएपछि चलचित्रको हाइप हुने नै भयो । चलचित्रले गज्जब हाइप बनायो । इनिसियल बक्सअफिस कलेक्सन पनि राम्रो गर्यो । तर यो चलचित्रलाई समीक्षकले भरमार गाली गरे । हरिवंशले दर्शकको गाली खाए । ओभर एक्ट गरेको, नाटकको जस्तो लामो सर्ट राखेको भन्दै उनको चर्को आलोचना भयो । समीक्षा र आम प्रतिक्रियाबाट आफूलाई पनि सिकाइ भएको स्वयं हरिवंशले नै बताए ।

फागुन ९ गते रिलिज भएको चलचित्र ‘आमा’ले यो वर्ष राम्रो समीक्षा मात्रै बटुलेन नाफा पनि कमायो । ‘पशुपतिप्रसाद’का निर्देशक दीपेन्द्र के. खनालले निर्देशन गरेको चलचित्रबाट उनले ‘पशुपतिप्रसाद’बाट कमाएको शाख पुनः बटुले । यो वर्ष राम्रो समीक्षा पाउने एकमात्र चलचित्र उनकै बन्यो । 

विडम्बना उनको चलचित्र प्रदर्शन भइरहेका बेला कोभिड–१९ को महामारी नेपाल छिर्यो । र यसबाट बच्न सरकारले सतर्कता अपनाउँदा सिनेमा हल बन्द भए । चलिरहेको चलचित्र हलबाट उत्रियो । त्यसपछि फागुनको दोस्रो साता अर्को चलचित्र ‘धुलो’ बिना पब्लिसिटी रिलिज भयो । दर्शकले आए–गएको पत्तै नभएको यही चलचित्र नै यो वर्षको अन्तिम चलचित्र बन्न पुग्यो । 

यी चारबाहेक रिलिज भएका ५१ चलचित्रले बक्स अफिसमा आफूलाई अब्बल साबित गर्न सकेनन् । ‘सेन्टिभाइरस’ले बक्सअफिसमा राम्रै उपस्थिति देखाए पनि उच्च लगानीका कारण धेरै नाफा कमाउन सकेन । राम्रो हाइप बनाएर पनि ‘घामड शेरे’, ‘हजार जुनीसम्म’, ‘मारुनी’, ‘रातो टीका निधारमा’, ‘साङ्लो’, ‘सेल्फी किङ’, ‘पासवर्ड’, र ‘आप्पा’ले दर्शकको मन जित्न सकेनन् । गत वर्ष ९६ चलचित्र रिलिज हुँदा यो वर्ष ५५ वटा मात्रै रिलिज भए । रिलिज डेट लिएर पनि चारवटा चलचित्र रिलिज हुन पाएनन् । यी चलचित्र पनि रिलिज भएको भए ०७६ मा प्रदर्शन हुने चलचित्रको संख्या ५९ पुग्थ्यो । 

यो वर्ष स्टारडम भएका भनिएका नायक अनमोल केसी, प्रदीप खड्का, सलिनमान बानियाँका चलचित्र रिलिज भएनन् । तर अभिनयमा अब्बल भनेर चिनिएका दयाहाङ राई र विपिन कार्कीका चलचित्र रिलिज भए । ‘सेल्फी किङ’ र ‘जात्रै जात्रा’मा विपिन देखिए भने ‘जात्रै जात्रा’, ‘कबड्डी कबड्डी कबड्डी’, ‘आप्पा’ र ‘सेन्टी भाइरस’मा दयाहाङ राईले अभिनय गरेका चलचित्र रिलिज भए । यसर्थ यो वर्ष उनीहरूकै रजगज रह्यो । 

कोरोनाका कारण यो वर्ष रिलिज डेट लिएका चलचित्र पनि पछि सर्नुपर्यो । कालो वर्षबाट सुरु भएको यो वर्षको नेपाली चलचित्रको यात्रा कालै भयोभन्दा फरक पर्दैन । 

प्रेम गीत ३, म यस्तो गीत गाउँछु २, चपली हाइट ३, नीरफूल र लक्का जवान यो वर्षको अन्तिममा आउने तयारी गरेर रिलिज डेट लिइसकेका चलचित्र पनि आउन पाएनन् । लक्का जवान र नीरफूलबाहेकका तीनवटै चलचित्र लार्जर देन लाइफको मान्यतामा रहेर बनेका चलचित्र हुन् । बिग बजेटमा बनेका चलचित्रको बैंकको मिटर ब्याज घुमिरहे पनि कोरोनाको कहर कहिले सकिएला र दर्शक हलमा गएर चलचित्र हेर्न थालेपछि रिलिज गरौंला भन्ने झिनो आशमा चलचित्रकर्मी कोरोना संक्रमणको अन्त्य कुरेर बसिरहेका छन् ।