काठमाडौं । शैली थिएटरको आयोजनामा हुन लागेको ‘११औं राष्ट्रिय बाल नाटक महोत्सव २०७६’ मा १६ प्रतियोगी नाटक मञ्चनका लागि छानिएका छन् ।
आवेदनमा परेका ३५ स्क्रिप्टबाट मञ्चनका लागि १६ वटा छानिएका हुन् । बालबालिकाको मनोविज्ञान र नैतिक आचरणमा नकारात्मक असर नगर्ने, भाषामा केन्द्रित र राष्ट्रिय अखण्डतामा असर नपु¥याउने खालका स्क्रिप्ट मञ्चनका लागि छानिएको आयोजकको भनाइ छ ।
महोत्सव माघ २२ देखि २९ गतेसम्म राजधानीको रसियन कल्चर सेन्टरमा हुनेछ । आठदिने महोत्सवमा १६ प्रतियोगी नाटक र शैली थिएटरकै अप्रतिस्पर्धी नाटक मञ्चन हुनेछन् । महोत्सवमा करिब चार सय विद्यार्थीहरूले नाटकमा सहभागिता जनाउने छन् ।
महोत्सवको उद्घाटन शैली थिएटरको नाटक ‘सुनौलो माछा’ बाट गरिनेछ । हरेक दिन ३ वटा नाटक मञ्चन हुने तयारी छ । महोत्सवभर नाटक मञ्चन, बालबालिका र नाटकसम्बन्धी छलफल, साहित्यिक कार्यक्रमलगायत गतिविधिहरू हुनेछन् ।
अन्तिम दिन प्रतियोगी नाटकमध्ये उत्कृष्टलाई पुरस्कार र सहभागीलाई प्रमाणपत्र प्रदान गरिनेछ । शैलीका महोत्सव संयोजक सुवास सुवेदीका अनुसार उत्कृष्ट अभिनय पुरस्कार स्वरूप दुई जनालाई १० हजार रुपैयाँ दिइनेछ ।
उत्कृष्ट निर्देशन पुरस्कार र उत्कृष्ट नाटक पुरस्कार स्वरूप सात हजार रुपैयाँ प्रदान गरिनेछ । त्यस्तै प्रोत्सहान पुरस्कार र पब्लिक च्वाइस् पुरस्कार स्वरूप दुई जनालाई ५–५ हजार रुपैयाँ दिइनेछ ।