सिन्धुपाल्चोक । वैशाख १२ गते विनासकारी भूकम्पको दुई वर्ष पूरा हुँदैछ । भूकम्पको केन्द्रविन्दू उत्तरी गोरखाको बारपाक भए पनि बढी प्रभावित सिन्धुपाल्चोक हुन पुग्यो । सिन्धुपाल्चोकमा मात्रै करिब पाँच हजारको ज्यान गएको सरकारी तथ्याङ्क छ ।

भूकम्पबाट क्षतविक्षत बनेको सिन्धुपाल्चोक दुई वर्षसम्म पनि तङ्ग्रिन सकेको छैन । करिब दुई सय जनाले मात्र आवास अनुदानको दोस्रो किस्ता पाएका सिन्धुबासी अहिले पनि बारिका पाटा, खेतका गह्रामा टहरा हालेरबस्न बाध्य छन् । स्वास्थ्य चौकी, विद्यालय कहिले बन्ने हुन्, यकिन छैन ।
दुई हिँउदवर्षा  टहरामै झेलेका पीडितहरूले यो वर्षामा पनि घर बनाउनसक्ने अवस्था छैन ।

रकम अभावले छिट्टै घर बनाउन नसकेको पीडितहरू बताउँछन् । उनीहरू भन्छन्, “सरकारी मापदण्ड अनुसार घर बनाउने हो भने दश लाखले पनि घर बन्दैन । इन्जिनियरहरू दिनकै आएर घरको मापदण्ड पुगेन भन्छन् । लात्ताले हाने भत्काइदिन्छन्, कसरी बन्नु घर ?”

स्थानीय हरि खनाल तर्क गर्छन्, “सरकारले खटाएका इन्जिनियर केही काम गर्दैनन् । उनीहरूसँग न सीप छ । न स्थानीय भूगोलको जानकारी । यसो आँखा डुलाउँछन् र घर बनाएको मिलेन भनेर हिँड्छन् ।”

उनले सिन्धुपाल्चोकमा पुनःनिर्माणले गति लिन नसक्नुमा प्राविधिको अदक्षता, सरकारको उदासिनता र जनप्रतिनिधिको गैरजिम्मेवारिता भएको औँल्याए ।

“सिन्धुपाल्चोबाट जितेर गएका जनप्रतिनिधले एकदिन संसदमा कुरा उठाएको सुनिएन । न पुनःनिर्माणको सुस्तताबारे कतै चर्चा गरेको नै सुनियो,” उनले थपे ।
हेरौँ तस्बिरहरू