काठमाडौं । शुक्रबार प्रतिनिधिसभा बैठकको अध्यक्षता गर्न ज्येष्ठ सदस्य महन्थ ठाकुर तयार भइसकेका थिए । 

बिहीबार नै संसद् सचिवालयले उपसभामुखको राजीनामा आउने भन्दै बैठक सञ्चालन ज्येष्ठ सदस्यको अध्यक्षता गर्नका लागि ठाकुरलाई तयारी रहन आग्रह गरेको थियो ।

संसद सचिवालय स्रोतका अनुसार ठाकुर बैठकको अध्यक्षता गर्नका लागि तयारी अवस्थामा थिए ।

शुक्रबार बिहानसम्म उपसभामुखले राजीनामा गर्ने, बैठकको अध्यक्षता ठाकुरले गर्ने र आइतबार सभामुखको उमेदवारी दर्ता र सोमबार निर्वाचन गर्ने कार्यतालिकासमेत प्रतिनिधिसभा सचिवालयले अनौपचारिक रुपमा तयार गरिसकेको थियो । 

सो बारे सचिवालयले राजनीतिक दलहरुसँग अनौपचारिक छलफल समेत गरिसकेको स्रोतले जानकारी दियो ।

तर, उपसभामुख तुम्बाहाम्फेको राजीनामा नआएपछि शुक्रबार दिउँसो १ बजेका लागि तय भएको बैठक सूचना टाँस गरेरै स्थगन गरियो । न उपसभामुखको राजीनामा आयो, न ठाकुरले नै बैठकको अध्यक्षता गर्ने अवस्था बन्यो । 

प्रतिनिधिसभाको अर्को बैठक पुस १६ गतेका लागि आह्वान गरिएको छ । 

संसद्मा अलमलः नेकपाभित्रै उल्झन

सत्तारुढ दल नेकपा सभामुख पद आफैसँग राख्न चाहन्छ । उसो त नेकपाभित्रका पूर्वएमाले र पूर्वमाओवादी खेमा सभामुख आफ्नो भागमा पार्न चाहन्छ । 

नेकपाभित्रैको यही उल्झनका कारण उपसभामुखको राजीनामा टर्दै गएको छ भने सभामुख चयन प्रक्रिया थप लम्बिएको छ । 

पार्टी अध्यक्षको निर्देशन आए राजीनामा गर्न आफु तयार रहेको उपसभामुख तुम्बाहाम्फेले आफू निकटकासँग बताइसकेको स्रोत दाबी गर्छ ।

तर, उनलाई शुक्रबार दिउँसोसम्म पनि त्यस्तो निर्देशन नआएको स्रोतको दाबी छ ।

संवैधानिक व्यवस्था अनुसार सभामुख र उपसभामुख फरक फरक पार्टी र फरक लिङ्गको हुनुपर्ने छ । वर्तमान उपसभामुख नेकपाकै भएकाले उनले राजीनामा नदिएसम्म नेकपाले सभामुख पाउने बाटो खुल्दैन । 

पुस ४ गते सुरु भएको संसदको पाँचौं अधिवेशन उपसभामुखलाई राजीनामा गराउने र सभामुखमा पार्टीभित्र सहमति खोज्नैका लागि शुक्रबारसम्म स्थगित गरिएको थियो ।

सभामुख चयनको कार्यतालिका उपसभामुख तुम्बाहाम्फेले नै ल्याउँदा नेकपाको उपभामुख कायम रहेको मानिने भन्दै कांग्रेसले प्रधानमन्त्री केपी ओलीसँगको भेटमा सभामुख पद आफैसँग राख्ने हो भने राजीनामा गराउन सुझाव दिएको थियो । 

कांग्रेस सभापति शेरबहादुर देउवा र नेता रमेश लेखकले बालुवाटार पुगेरै प्रधानमन्त्री ओलीलाई यस्तो सुझाव दिएका थिए ।

तर, राजीनामाबारे नेकपा निर्णयमा नपुग्दा संसद् बैठक एकसाता धकेलिएको छ । 

अब के गर्ने ? 

पूर्वमाओवादीले समेत सभामुखमा दाबी गरेपछि उपसभामुखलाई राजीनामा गराउन पूर्वएमालेलाई सकस परेको छ । 

त्यसकारण तुम्बाहाम्फेकै अध्यक्षतामा सभामुख निर्वाचनको कार्यतालिका अघि बढाउने र पछि राजीनामा गराउने योजनामा थिए प्रधानमन्त्री । 

तर, प्रमुख प्रतिपक्षीले समेत राजीनामा गराउन सुझाएपछि ओली अन्योलमा परेका छन् । 

स्रोतका अनुसार सभामुखमा पूर्वएमालेबाट सुनिश्चित नभएसम्म उपसभामुखबाट तुम्बाहाम्फेलाई नहटाउने निष्कर्षमा ओली पुगेका छन् । 

उपसभामुख रिक्त रहेको अवस्थामा पूर्वमाओवादीले गलाउन सक्ने पूर्वएमालेहरुको विश्लेषण छ । 

पूर्वमाओवादीबाट अग्नि सापकोटाको नाम अघि सारिएको छ । 

पूर्वएमाले सुवास नेम्वाङलाई सभामुख बनाउन चाहन्छ । नेकपाका अध्यक्षद्वय पुष्पकमल दाहाल र ओलीबीच कसलाई सभामुख बनाउने सहमति नभएसम्म सभामुख चयन प्रक्रिया लम्बिने स्रोतको दाबी छ ।