चितवन । मंसिर २८ गते अण्डा उत्पादक संघ र वितरकहरूको अण्डाको मूल्य निर्धारण गरिएको विषयमा पक्राउ परेका पांँच जना किसानलाई हालसम्म रिहाई नगरिएको भन्दै किसानले भरतपुरको व्यस्त सडकमा अण्डा फुटाएर विरोध गरेका छन् ।

भरतपुरमा संघले बिनाकसुर उनीहरूलाई हिरासतमा राखेर मुद्दा चलाएको भन्दै विरोधस्वरूप अण्डा नष्ट गरेका हुन् । उनीहरूले बिचौलियाको विरोधमा जिल्ला प्रहरी कार्यालय, अगाडि हुँदै चौबीसकोठीसम्म प्रदर्शन गरेका थिए । चौबीसकोठीमा पुगेर उनीहरूले १५ पेटीभन्दा बढी अण्डा फुटाएको एक किसानले बताए ।

प्रदर्शनमा बिचौलिया मुर्दावाद । निर्दोष किसानलाई बिनासर्त रिहाई गर, सम्पूर्ण किसान एक हौं लेखिएका प्लेकार्ड बोकेका थिए । अण्डा उत्पादक संघका केन्द्री कोषाध्यक्ष राजकुमार श्रेष्ठले विनाकसुर किसानलाई हिरासतमा राखिएको र नछाडिएकाले अण्डा नष्ट गरेर विरोध गरेको बताए । ‘यो प्रदर्शन किसानको रिहाइको माग र विचौलियाको विरोध पनि हो,’ उनले भने ।

जिल्ला प्रहरी कार्यालय चितवनका प्रवक्ता एक नारायण कोइरालाले अण्डा वितरकमाथि अभद्र व्यवहार गरेका कारण ती पांँच जना किसानमाथि मुद्दा चलाइएको जानकारी दिए । उनीहरूमाथि थप अनुसन्धान भइरहेको कोइरालाको भनाइ छ ।

गत कात्तिक २१ गते र मंसिर २४ गते अण्डा उत्पादक संघ, अण्डा उत्पादक र बिक्रेता बीच मूल्य निर्धारण गरी सोही अनुसार बिक्री–वितरण गरिने सम्झौता भएको थियो, त्यसको ४ दिन नबित्दै वितरकले मनोमानी ढंगले मूल्य घटाएर खरिद बिक्री गरेको भन्दै अण्डा उत्पादक किसान र वितरक बीच विवाद र दुव्र्यवहार हुंँदा पांँच जना किसान गिरफ्तारीमा परेका थिए ।

उनीहरूको रिहाई नभए देशभरका किसान आन्दोलनमा उत्रने समेत किसानहरूले चेतावनी स्वरुप अण्डा नष्ट गरेका हुन् ।