चितवन । चितवनमा चालु आर्थिक वर्षको तीन महिनामा सवारी दुर्घटनामा परी ३८ जनाको मृत्यु भएको छ । २१७ जना घाइते भए ।

जिल्ला ट्राफिक प्रहरी कार्यालय चितवनका अनुसार सवारी दुर्घटनामा परी सबैभन्दा बढी असोजमा २० जनाको मृत्यु भएको छ । साउनमा ११ र भदौमा सातजनाको मृत्यु भएको तथ्यांक छ ।

यस्तै, सवारी दुर्घटनामा परी साउनमा ७५ जना घाइते भएका थिए । भदौमा ७३ र असोजमा ६९ जना घाइते भएका थिए ।

कार्यालयका प्रमुख प्रहरी निरीक्षक भगवानराज थापाले असोजमा चाडपर्व परेको र अत्यधिक सवारीको चापसँगै लापरबाही गरिँदा दुर्घटना र मानवीय क्षति बढी भएको बताए । “चाडपर्वमा स्थानीय रुटदेखि लामो दूरीका यातायातको चाप पनि बढ्छ,” उनले भने, “चालकले तीव्र गति र मापसे गरेको पनि पाइयो ।”

भित्री सडकमा बढी दुर्घटना
जिल्लामा भएकामध्ये सबैभन्दा बढी दुर्घटना भित्री सडकमा भएको देखिएको छ । तीन महिनाको अवधिमा भित्री सडकमा ६१ वटा सडक दुर्घटना भएका थिए । ती दुर्घटनामा १७ जनाको मृत्यु भएको थियो । ६१ जना घाइते भएका थिए ।

उक्त अवधिमा पूर्व–पश्चिम लोकमार्गमा ३२ वटा सडक दुर्घटना भएका छन । जसमा १२ जनाको मृत्यु भएको थियो । ६३ जना घाइते भएका थिए । कार्यालयका अनुसार तीन महिनामा नारायणगढ–मुग्लिन सडकखण्डमा २८ वटा सडक दुर्घटना भए । ती दुर्घटनामा परेर पाँचजनाको मृत्यु भएको थियो । ३५ जना घाइते भए ।

यस्तै, पृथ्वी राजमार्गमा ६ वटा दुर्घटना भएकोमा चारजनाको मृत्यु र आठजना घाइते भएका थिए । जिल्लाको सहरीखण्डका सडकमा नौवटा सवारी दुर्घटना भएकोमा ११ जना घाइते भएका थिए ।

चालु आर्थिक वर्षको साउनदेखि असोजसम्म तीन महिनामा कुल १३६ वटा सवारी दुर्घटना भएको तथ्यांक छ ।

भित्री तथा ग्रामीण सडकमा ट्राफिक प्रहरीको पहुँच नपुग्ने र गल्ली तथा त्यस्ता सडकमा चालकले जथाभावी सवारीसाधन चलाउनाले दुर्घटना बढी हुने गरेको कार्यालय प्रमुख थापाको भनाइ छ । “सहरी इलाकामा ट्राफिक प्रहरीको पहुँच पनि हुन्छ । निगरानी पनि बढी हुन्छ । चालक पनि सचेत हुन्छन्,” उनले भने, “अर्को कुरा, यहांँ सवारीसाधनको तुलनामा हाम्रो जनशक्ति अत्यन्त न्यून छ ।”

ट्राफिक प्रहरीले अहिले जोखिमका क्षेत्रहरूमा २४ सै घण्टा नियमित चेकजाँचसँगै ट्राफिक सचेतनाका कार्यक्रम गरिरहेको थापाले बताए ।