काठमाडौं । प्रधानसेनापति सातौं राष्ट्रिय महिला फुटबल प्रतियोगिता आजबाट सुरु हुँदैछ । नेपाली सेनाको आयोजनामा आजबाट प्रधानसेनापति सातौं राष्ट्रिय महिला फुटबल प्रतियोगिता सुरु हुन लागेको हो ।

३ विभागीय क्लबसहित ३ प्रदेशका टोली, भुटान र सिक्किमको टोली पनि प्रतियोगितामा सहभागीता हुँदैछ ।

जसमा आयोजक आर्मी, नेपाल पुलिस क्लब र सशस्त्र प्रहरीको एपीएफ तथा प्रदेश नम्बर १, २ र ५ को सहभागिता रहनेछ । भुटान र सिक्किमको टोली पनि सहभागी हुने बताइएको छ ।

लिग कम नकआउटका आधारमा हुने प्रतियोगिताको समूह एमा एपीएफ, प्रदेश १, सिक्किम र आर्मी छन् । समूह बीमा पुलिस, भुटान, प्रदेश २ र प्रदेश ५ छन् । समूहका शीर्ष दुई टिम सेमिफाइनल पुग्नेछन् ।

पुस ९ गतेसम्म चल्ने प्रतियोगिताको विजेताले ३ लाख रुपैयाँ पाउनेछ भने उपविजेताले १ लाख ५० हजार तथा तेस्रो हुनेले १ लाख रुपैयाँ पाउनेछ । 

प्रतियोगिताको सर्वोत्कृष्ट खेलाडीले एक थान स्कुटर पाउनेछ । उत्कृष्ट गोलकिपर, डिफेन्डर, मिडफिल्डर, फरवार्ड तथा प्रशिक्षकलाई जनही १० हजार दिइने बताइएको छ ।