चितवन । नेपाली कांग्रेसका केन्द्रीय सदस्य गगन कुमार थापाले चितवनका मतदातालाई सेवक रोज्ने कि शासक आफैंले फैसला गर्नुपर्ने बताएका छन् । 

उपनिर्वाचनको संघारमा यहाँ हुने तीनवटा वडाको चुनावी सभालाई सम्बोधन गर्दै सरकारलाई सबक सिकाउन पनि कांग्रेसले चुनाब जित्नै पर्ने जिकिर गरे ।  

दुई तिहाई सरकार मातले उन्मत्त भएको समेत उनले आरोप लगाए । "आफूलाई भोट नहाले विकास नहुने धम्की दिने नेकपाबाट के आशा गर्न सकिन्छ तपाईं सेवक रोज्नु हुन्छ कि शासक?," उनको प्रश्न थियो ।

"यो समय हामीले हिजो के गर्यौ भन्ने होइन आज के भइरहेको छ त्यो हेर्ने हो" उनले थपे । दुईवटा पाइलटले देशलाई कता लाँदैछन् भन्ने कुराको हेक्का गरेर मतदान गर्न उनले  मतदातालाई अपिल गरे । अहिलेको उपनिर्वाचनमा नेकपालाई सबक सिकाएनौं भने देश तपाईं हामीले भनेको ठाउँमा जान नसक्ने उनको भनाई थियो ।

नेता थापाले शक्तिशाली रुपमा रहेका प्रधानमन्त्री केपी शर्माले ओलीले दुई वर्षको अवधिमा जन चाहना अनुसार काम गर्न नसकेको आरोप लगाए । 
  
सो अवसरमा बोल्दै नेता थापाले सरकार मात्रै नभएर नेकपाका दुवै अध्यक्षको महत्वकांक्षी भएको आरोप लगाए । वडा अध्यक्षको निर्वाचनलाई आफ्नो प्रतिष्ठा ठान्ने प्रचण्डलाई सबक सिकाउन आवश्यक रहेको उनको भनाई थियो । कांग्रेस कहिल्यै पनि नआत्तिने भएकाले जनतामा निरास नहुन पनि उनले आग्रह गरे ।
   
सभालाई कांग्रेस केन्द्रीय सदस्य डिना संग्रोला, जिल्ला सभापति जीत नारायण श्रेष्ठ, नेपाली कांग्रेससकातर्फबाट वडाअध्यक्षका उमेदवार अमृत हमाल लगायतले मन्तव्य राखेका थिए । कार्यक्रममा नेकपा परित्याग गरी एक सय पचास जना कांग्रेसमा प्रवेश गरेका थिए ।

राप्रपा संयुक्तको समर्थन कांग्रेसलाई

भरतपुर महानगरपालिका वडा नम्वर १६ मा यहि मङ्सिर १४ गते हुन लागेको उपनिर्वाचनमा मनोनयन दर्ता गराएको राष्ट्रिय प्रजातन्त्र पार्टी संयुक्तले आफ्नो समर्थन कांग्रेस उमेदवारलाई रहेको जनाएको छ ।  नेपाली कांग्रेस भरतपुर महानगरपालिका वडा नम्वर १६ को चुनाव प्रचारप्रसार समितिले आयोजना गरेको चुनावी सभामा सम्बोधन गर्दै राप्रपा संयुक्तका जिल्ला सचिव केशव भण्डारीले आफुहरुको समर्थन काङ्ग्रेसको उम्मेदवारलाई भएको बताए । 

भण्डारीले जिल्ला समितिको निर्णय सुनाउँदै भरतपुर महानगर वडा नम्वर १६ मा हुन लागेको उपनिर्वाचनको सन्दर्भमा पुरानो लोकतान्त्रिक गठबन्धनलाई सहयोग गरेको जानकारी गराएका थिए ।

सो अवसरमा राष्ट्रिय प्रजातन्त्र पार्टी संयुक्तले आफ्नो समर्थन नेपाली काङ्ग्रेसका उम्मेदवारलाई रहेको घोषणा गरेको छ ।  संयुक्तका तर्फबाट वडा अध्यक्षका उम्मेदवार विष्णु त्रिपाठीले लोकतान्त्रिक गठबन्धनका माध्यमबाट देशको रक्षा आवश्यक भएको पार्टीको ठहरलाई सहर्स स्वीकार गर्दै अघि बढ्न र निर्वाचनमा रुख चिन्हमा मतदान गरि काङ्ग्रेसलाई विजयी गराउन समेत आह्वान गरे ।