पोखरा । मुस्ताङबाट भेडा च्याङ्ग्रा झरिसके । कतिपय पोखरा आइपुगे, कति बाटोमा नै छन् । मुस्ताङबाट तल झरेदेखि बाटोमा नै भेडाच्याङ्ग्राको खरिदबिक्री पनि हुन्छ । पोखरा र आसपासमा दसैंको समयमा खसी बोकाभन्दा पनि च्याङ्ग्रा नै खाने प्रचलन छ । 

यसपटक दसैंमा पोखराको लागि १५ हजार भेडाच्याङ्ग्रा पोखरा झर्दैछन् । ढिलो ल्याउनेले पनि फूलपाती अघि नै पोखरा ल्याइपुर्याउँछन् । च्याङग्रा बाहेक पोखरामा थप १० हजार खसीबोका पनि झरेका छन् । खसी बजारले दसैंको लागि १० हजार खसीबोका बिक्री गर्नेछ ।

तर, दसैंमा मुख्य रुपमा भने हिमाली च्याङ्ग्रा नै रैथाने पोखरेलीको रोजाइ हो । पोखरा क्षेत्रमा भेडा–च्याङ्ग्राको मात्र करिब ५० करोडको कारोबार हुने गरेको छ । यस वर्ष पोखरामा करिब १५ हजार भेडा च्याङ्ग्रा भित्रिँदैछन् । एउटा च्याङ्ग्राको मूल्य २० हजारदेखि ३० हजारसम्म पर्ने गरेको छ । व्यवसायीहरूले च्याङ्ग्राको तयारी मासु प्रतिकेजी १ हजार ५ सय रुपैयाँले बिक्री गर्ने गरेका छन् ।

कास्की मासु व्यवसायी संघका अध्यक्ष गोविन्द तिवारीका अनुसार दैनिक खपतबाहेक पोखरामा यसपालि १५ हजार खसीबोका र च्याङ्ग्रा भित्रिएका छन् । यसबाहेक पोखरामा औषत एक दिनमा तीन सय ५० वटा खसीबोका काटिने गरेका छन् । चाडपर्वको समयमा गाउँतिरबाट र अवैध तरिकाबाट पनि ३ हजारको संख्यामा खसीबोका आउने उनको भनाइ छ । कुखराको तथ्यांक भने दसैंमा घट्ने गर्दछ । दैनिक ७० हजार किलो मासु खपत गर्ने पोखरा महानगरमा दसैंमा भने ५० हजार किलोसम्म झर्न सक्ने तिवारीको अनुमान छ ।

दसैंमा मात्र पोखरामा भेडा च्याङ्ग्रा, खसी तथा बोका र कुखुराको गरी करिब एक अर्ब ५० करोड बराबरको मासुको कारोबार हुने तिवारीले बताए । उनका अनुसार दसैंको अवसरमा करिब ५० करोड बराबरको मासुको कारोवार विभिन्न व्यवसायीहरु भन्दा बाहेक व्यक्ति तथा समूहबाट हुने गरेको छ । 

खुल्ला बजार भएसँगै पोखरामा खसीबोका अनगिन्ती ढंगले भित्रिएसँगै पोखरामा आफूहरुले आकलन गरेको भन्दा बढी कारोबार हुन सक्ने उनले जनाए । 

तस्बिरः दिनेश तिवारी