काठमाडौं । एटीएम बुथबाट अर्बौं लुट्ने योजनासहित आएका सातजना चिनियाँ र एकजना फ्रेन्च नागरिक नेपाल आउनुअघि कम्बोडिया गएको खुलेको छ । उनीहरुको ‘ट्राभल हिस्ट्री’ले उनीहरु नेपालअघि लामो समय कम्बोडियामा रहेको खुलेको हो । प्रहरीले सो समूहका ६ जना र अन्य ३ जना नेपालीलाई पक्राउ गरेको छ । चिनियाँ दुईजनाको खोजी जारी छ ।

महानगरीय प्रहरी परिसरका वरिष्ठ प्रहरी उपरीक्षक (एसएसपी) उत्तमराज सुवेदीले भने, ‘‘कम्बोडियामा एटीएम बुथ ह्याक गरेर विभिन्न समयमा रकम निकालिएको सञ्चारमाध्यममा आइरहेकै हो । यो समूहको पनि कम्बोडियामा पटक–पटक आवतजावत भएको देखिन्छ । यही समूहले त्यहाँ पनि नेपालकै जस्तो घटना गरे कि भन्ने आशंका गर्न सकिन्छ ।’’

अनुसन्धान जारी रहेकाले अहिले नै सबै विषय भन्न नसकिने सुवेदी बताउँछन् । शुक्रबार नेपाल प्रवेश गरेको चिनियाँ ह्याकरको समूह सोमबार स्वदेश फर्किने योजनामा थियो । दोभाषेको सहयोग लिएर प्रहरीले अनुसन्धान प्रक्रिया अघि बढाएको एसएसपी सुवेदीले बताए ।

अनुसन्धानमा संलग्न एक प्रहरी अधिकारीका अनुसार उनीहरुले बयानका क्रममा समेत झुट बोलेका छन् । उनीहरुमध्ये केहीले नेपालमा रकम लुट्ने योजना स्पेनमा र केहीले फ्रान्समा योजना बनाएको बताएका छन् । शुक्रबार त्रिभुवन अन्तर्राष्ट्रिय विमानस्थलमा अवतरण गरेको सो समूहले इन्टरनेट चलाउनका लागि नेपाली सिमकार्ड प्रयोग गरेको खुलेको छ ।

तर ती सिमबाट कसैलाई पनि फोन भने नगरेको पाइएको प्रहरीका एक अधिकारीले बताए । उनले भने, ‘‘उनीहरुले चिनियाँ म्यासेजिङ एप वीच्याट मार्फत् विभिन्न व्यक्तिसँग सम्पर्क गरेको देखिन्छ । सबै तथ्यबारे अनुसन्धान हुँदैछ । भाषाको समस्या भएकाले अनुसन्धानमा कठिनाइ भएको छ ।’’ यसअघि भारतमा पनि यस्तै प्रकारको घटना भएको थियो । तर त्यहाँ ह्याकर समूहका कोही पनि पक्राउ परेका थिएनन् । नेपालमा भने पहिलोपटक नै ह्याकरको समूह पक्राउ परेको हो ।

शनिबार पक्राउ परेका ५ जना र आइतबार राति विमानस्थलबाट पक्राउ परेका एक जना छुट्टाछुट्टै रुपमा परिचालन भएको हुनसक्ने प्रहरी अनुमान छ । एक अधिकारीले भने, ‘‘आइतबार पक्राउ परेका व्यक्तिले शनिबार पक्राउ परेकालाई चिन्दिन भनेका छन् । त्यसले कतै दुई गिरोह एकैपटक आएको त थिएन कि भन्ने पनि छ ।’’ तर पक्राउ परेका कसैले पनि आफू मुख्य योजनाकार नभएको दाबी गर्दै आएका छन् । परिसरका एसएसपी सुवेदीले भने, ‘‘उनीहरु धेरै कुरा बोल्नै मानिरहेका छैनन् । हामी सुक्ष्म अनुसन्धानमा छौं । ठूलो रकम लुटिनबाट जोगिएको छ । उनीहरुले झिकेको रकम लगभग सबै बरामद भइसकेको अवस्था छ ।’’

भारत र चीनको चासो

चिनियाँ ह्याकर समूह नेपालमा पक्राउ परेपछि भारत र चीनले त्यसबारे चासो देखाएका छन् । एटीएम बुथको स्विच ह्याक गरी भारतमा समेत करोडौं रकम झिकिएको घटना भएकाले भारतले चासो देखाएको हो । एक प्रहरी अधिकारीका अनुसार भारतीय रिजर्भ बैंकले भारतीय प्रहरीमार्फत् नेपाल प्रहरीसँग घटनाबारे जानकारी लिएको छ । भारतमा एटीएम बुथको स्विच ह्याक गर्ने कोही पनि पक्राउ परेका थिएनन् ।

चीनले भने आफ्नो देशका नागरिक भएकाले चासो दिएको हो । आइतबार साँझ नै नेपालस्थित चिनियाँ दूतावासका फर्स्ट सेक्रेटरी फिङसा ओलिनले परिसरमै आएर आफूहरुसँग भेट गरेको परिसरका डीएसपी होविन्द वोगटीले पुष्टि गरे । उनले भने, ‘‘उहाँहरुले चिनियाँ नागरिक भए पनि अनुसन्धानमा पूर्ण सहयोग रहन्छ भनेर जानुभयो । उहाँले घटनाको बारेमा पनि जानकारी लिनुभयो ।’’ 

प्रहरी अधिकारीबाहेक चिनियाँ दूतावासको टोलीले पक्राउ परेका पाँचै जना चिनियाँ नागरिकलाई समेत भेटेको थियो । प्रहरीले चिनियाँ लु जिया लिङ, चेन विन विन, झु लियाङ आङ, क्यु याङ यिङ र लिन जिनमिङलाई शनिबार दरबारमार्गबाट पक्राउ गरेको हो । अर्का एकजना चिनियाँ मूलका फ्रान्सेली नागरिक सु लुस लीलाई त्रिभुवन अन्तर्राष्ट्रिय विमानस्थलबाट भाग्दाभाग्दै आइतबार राति पक्राउ गरेको हो । 

ह्याकरको समूहले नबिल र प्रभु बैंकको एटीएम पिन नम्बर ह्याक गरेर रकम झिकेका थिए । एक प्रहरी अधिकारीले भने, ‘‘अन्य बैंकमा पनि यस्तो घटना भएको हुनसक्छ । तर कतिपयले बाहिर ल्याउन खोज्दैनन् ।’’ पक्राउ परेकाहरुको साथबाट एक करोड २६ लाख २९ हजार नेपाली रुपैयाँ र नौ हजारभन्दा बढी अमेरिकी डलर बरामद भएको थियो ।

प्रहरीले ह्याकरहरुलाई पैसा सटही गर्ने नेपालय मनी एक्सचेन्जका सञ्चालक रोशन श्रेष्ठ र म्यानेजर रेवती दवाडी तथा डेक्सो मनी एक्सचेन्जका सञ्चालक देवनाथ लामिछानेलाई पनि पक्राउ गरेको छ । उनीहरुले नेपाली रुपैयाँ लिएर डलर दिएकाले पक्राउ गरिएको एसएसपी सुवेदीले बताए । 

सम्बन्धित समाचार

‘मालवेयर’ प्रयोग गरेर एटीएमबाट यसरी निकालियो रकम

एक चिनियाँ ह्‍याकर भाग्दाभाग्दै विमानस्थलबाट पक्राउ

बैंकहरूको अर्बौं रकम जोगाउने प्रहरीको तीनघण्टे अपरेसन