काठमाडौं । नेपाली कांग्रेसका सह–महामन्त्री डा. प्रकाशशरण महतले केन्द्रीय समितिमा प्रस्तुत गरेको राजनीतिक प्रस्तावको चर्को आलोचना भएको छ । सानेपामा जारी केन्द्रीय समितिको बैठकमा शुक्रबार र आइतबार बसेको बैठकमा केन्द्रीय सदस्यहरुले प्रतिवेदनको चर्को आलोचना गरेका हुन् । 

कांग्रेसको नेतृत्वमा जारी भएको संविधान, त्यसले संस्थागत गरेको परिवर्तनका मुद्दाहरु संघीयता, गणतन्त्र, धर्मनिरपेक्षतामा अपनत्व लिन नसकेको र सरकारसँग निराश भएका जनतालाई थप निराश बनाउने कुरा दस्तावेजमा लेखिएको भन्दै बैठकमा बोल्ने केन्द्रीय सदस्यहरुले राजनीतिक प्रस्ताव बदल्न सुझाव दिएका छन् । 

बैठकमा आफ्नो धारणा राख्दै केन्द्रीय सदस्य गगन थापाले राजनीतिक प्रस्ताव बदल्नुपर्ने बताए । 

“प्रतिगामीहरु सल्बलाए भनेर सरकारबाट निराश जनतालाई निराशा थप्नुहुँदैन । सरकारले गर्न नसकेको कुरा कांग्रेसले गर्छ भन्ने विश्वास जनतालाई दिलाउनेगरि कांग्रेस आउनुपर्छ,” थापाले बैठकमा भने, “संविधान संशोधन र संविधान कार्यान्वयन कांग्रेसले गराउँछ । संविधान विरोधी गतिविधि हुन दिन्नौं भन्ने स्पिरिट प्रस्तावमा देखिएन । यसलाई पुनर्लेखन गर्नुपर्छ ।” 

कांग्रेसको महासमिति बैठक र जागरण अभियानले पार्टी आन्तरिक रुपमा तंग्रिए पनि आम जनतासँग भने पार्टी पुग्न नसकेको थापाको भनाइ थियो । 

उनले अब कांग्रेस अन्तरमुखी कार्यक्रममा अल्मलिन नहुने भन्दै आम जनतालाई छुनेगरी प्रस्तुत हुनुपर्नेमा जोड दिए । सरकारको कामबाट निराश र असन्तुष्ट बनेका जनतामा कांग्रेसले गर्छ भन्ने विश्वास दिलाउन नसकिएको पनि उनले बताए ।  भ्रातृ संस्था र शुभेच्छुक संस्थामा समस्या पार्टीका नेताहरुकै कारणले उत्पन्न भएको भन्दै उनले कांग्रेस बलियो बनाउन भ्रातृ संस्थामा विगतको गल्ती नदोहोर्‍याउने प्रतिवद्धता नेतृत्वले गर्नुपर्नेमा थापाको जोड थियो । 

त्यस्तै स्थानीय तहमा रहेका कांग्रेसका निर्वाचित प्रतिनिधिहरुले उदाहरणीय काम गरेर देखाउन सक्नुपर्ने भए पनि त्यसो हुन नसकेको थापाको भनाइ थियो । 

त्यस्तै, अर्का केन्द्रीय चन्द्र भण्डारीले पनि सह–महामन्त्री महतले प्रस्तुत गरेको राजनीतिक प्रस्तावको आलोचना गरेका छन् । डा. महतले ल्याएको ‘स्क्रिप्ट’मा कांग्रेसको फिल्म नचल्ने उनको दाबी थियो ।  डेढ वर्षमै प्रधानमन्त्री केपी ओलीको फिल्म असफल भइसकेको भन्दै पार्टीको अहिलेको नेतृत्वको फिल्म पनि नचल्ने उनले बताए । डा. भण्डारीले कांग्रेसमा अब नयाँ हिरोहरु नयाँ स्क्रिप्टका साथ आउनुपर्नेमा जोड दिए । 

प्रजातन्त्रमा व्यक्ति असफल हुने तर प्रणाली असफल नहुने भन्दै उनले परिवर्तनका मुद्दामा नेताहरु अन्योलमा हुँदा अहिले ती विषयमा द्विविधा उत्पन्न भएको बताए । 

“अहिले देखिएको अस्थिरताको कारण नेतृत्व हो,” उनले भने । 

त्यस्तै अर्का केन्द्रीय सदस्य भिष्मराज आङदम्बेले कांग्रेसको राजनीतिक दस्तावेजलाई सत्तारुढ दल र अन्तर्राष्ट्रिय समुदायले समेत चासोका साथ हेर्ने बताए । 

राजनीतिक प्रस्ताव जुन रुपमा आउनुपर्थ्यो त्यो रुपमा नआएको भन्दै उनले बैठकमा सो प्रस्तावलाई अझ सशक्त बनाउनुपर्ने धारणा राखेका थिए । 

“संविधान हाम्रो नेतृत्वमा जारी भएको हो । संविधानका उपलब्धिलाई अपनत्व लिनेगरी राजनीतिक प्रस्ताव आउनुपर्छ,” उनले बैठकमा भने, “सरकारले आफ्नो कमजोरी ढाकछोप गर्न संसदीय प्रणालीलाई असफल भयो भनेर हल्ला गराइरहेको छ । संविधान जारी गर्दा मधेसी, आदिवासी जनजातिलाई संशोधन गरेर हल गर्छौँ भन्ने हाम्रो प्रतिवद्धता थियो । संविधान संशोधन गरेर ती समुदायलाई सम्बोधन गर्नुपर्छ ।” 

उनले कांग्रेसकै नेतृत्वमा संघीयता, गणतन्त्र र धर्म निरपेक्षता आएको भन्दै यसलाई जोगाउनेगरि कांग्रेस अघि बढ्नुपर्ने धारणा राखे । 

आइतबारको बैठकमा थापा, भण्डारी, आङदम्बे, डा. मिनेन्द्र रिजाल, महेश आचार्य, प्रदिप गिरी, रमेश रिजाललगायतले आफ्नो धारणा राखेका थिए । अर्को बैठक मंगलबार बस्नेछ ।