काठमाडौं । प्रत्यायोजित व्यवस्थापन तथा सरकारी आश्वासन समितिले सिंहदरबार बेलायती बैठक कक्षबाट हराएको गैंडाको खाग, बाह्रसिङेको सिङ र बाघको दाह्रा नंग्रा खोज्न गृह मन्त्रालयको ध्यानाकर्षण गराएको छ । 

साउन अन्तिम साता समितिका सभापति रामनारायण बिडारीसहितको टोली बैठक कक्षको अनुगमनमा जाँदा बैठक कक्षबाट बहुमूल्य गैंडाको खाग, बाघको दाह्रा, नंग्रा र जुँगा, बाह्रसिङे र जरायोको सिङ हराएको पाइएपछि सोबारे बुझ्न समितिले बुधबार गृहसचिव प्रेम राईलाई बोलाएको थियो । 

समिति सभापति बिडारीले बहुमूल्य वस्तु हराउनुमा गडबडी रहेको भन्दै सोबारे अनुसन्धान गर्न गृह सचिवलाई आग्रह गरेका थिए । “बेलायतबाट ल्याएका महँगा फर्निचर काम नलाग्ने भएका छन् । बेवारिसे अवस्थामा छन् । राणा, शाहवंशका फोटोहरु अलपत्र छन्,” उनले भने, “सुनौलो अक्षरले लेखिएका महँगा थान्काहरुको पनि बिजोग छ । त्यसलाई व्यवस्थापन गर्नका लागि गृह सचिवलाई बैठकमा बोलाएका हौं ।”

सिंहदरबारबाटै हरायो गैंडाको खाग, बाघको दाह्रा र बाह्रसिङेको सिङ

समितिका सदस्य राधेश्याम अधिकारीले बेलायती बैठक कक्षबाट बहुमूल्य अंगहरु हराएको टिपोट गृह मन्त्रालयसँग थियो कि थिएन ? भन्दै प्रश्न गरेका थिए । त्यस्तै उनले भने, “बेलायती बैठक कसको जिम्मेवारीभित्र रहन्छ ? गृहकि प्रधानमन्त्री कार्यालय वा संयुक्त ?”

जवाफमा गृहसचिव राईले गैंडाको खाग, बाघको दाह्रा र नंग्रा, बाह्रसिङेको सिङ हराएको टिपोट आफुहरुसँग नभएको बताए । 

बेलायती बैठकको जिम्मेवारीका सन्दर्भमा उनले भने, “गृह मन्त्रालय, प्रधानमन्त्री तथा मन्त्रिपरिषद्को कार्यालय र विगतमा रक्षामन्त्रालय पनि जोडिएको थियो ।”

राजतन्त्रको समाप्तिपछि सुरुमा राजदरबारका कर्मचारीलाई ल्याएर बेलायती बैठकको सुरक्षाको जिम्मा दिइएको पनि उनले समितिलाई जानकारी दिए । “हराएका गैंडाको खाग, बाघको दाह्रा र नंग्रा, बाह्रसिङेको सिङका कुरा यो यो थियो भनेर यकिन रेकर्ड पाइएको अवस्था छैन,” उनले भने । 

त्यस्तै, उनले यसअघि नै बेलायती बैठक कक्षबाट धेरै सामग्रीहरु राष्ट्रिय संग्रहालय र नारायणहिटी संग्रहालयमा पठाइएको पनि उनले सो क्रममा जानकारी दिए ।  उनले पहिला रहेको प्रधानमन्त्री तथा मन्त्रिपरिषद्को कार्यालयको अवस्था पनि बिजोग रहेको भन्दै त्यसतर्फ पनि काम गर्न समितिलाई आग्रह गरे ।