काठमाडौं । नेपाली कांग्रेसभित्र सभापति शेरबहादुर देउवाविरुद्ध एकजुट हुन वरिष्ठ नेता रामचन्द्र पौडेल समूहलाई तरुण नेताहरुले दबाब दिएका छन् ।

बिहीबार नक्सालमा भएको भेलामा तरुण दलका करिब ४ दर्जन बढी पूर्वनेताहरुले पौडेल महामन्त्री शशांक कोइराला र पूर्वमहामन्त्री प्रकाशमान सिंहलाई एकैठाउँ राखेर देउवाविरुद्ध एक भएर उभिन दबाब दिएका हुन् । उनीहरुले म होइन हामी भनेर अघि बढ्न पौडेल,कोइराला र सिंहलाई दबाब दिँदै नेताहरुले आ–आफ्नो डम्फु बजाउने हो भने आउँदो महाधिवेशनमा पनि देउवा नै हाबी हुनेतर्फ सचेत गराएको एक तरुण नेताले जानकारी दिए ।

सहमतिका नाममा तरुण दललाई समाप्त गर्ने काममा सभापति देउवाको सहयोगी बनेको भन्दै वरिष्ठ नेता पौडेलको उनीहरुले चर्को आलोचना समेत गरेको एक सहभागीले बताए । पौडेलको प्रस्तावमा भुपेन्द्रजंग शाही हाल तरुण दलका महासचिव छन् । उनीहरुले तीन नेताहरुलाई एकै ठाउँमा राखेर तरुण दलका सयौं नेता,कार्यकर्तालाई बेरोजगार बनाएको, सहमतिका नाममा जे पनि गरेको भन्दै नेतृत्वविरुद्ध आक्रोस पोखेका थिए ।

 “शेरबहादुर देउवाको कार्यशैलीविरुद्ध लड्न एक ठाउँमा उभिन दबाब दियौं,” तरुण दलका एक पूर्वपदाधिकारीले गोप्य भेलाबारे जानकारी दिँदै भने, “सहमतिका नाममा तरुण दललाई ४ जनामा सीमित गरियो । संगठन समाप्त गरिएकोमा धेरैको आक्रोस थियो ।”

अहिलेको तरुण दल केन्द्रीय समितिले काम गर्न नसकेकोमा पनि उनीहरुले असन्तुष्टि पोखे । तरुण दलका अध्यक्षमा देउवा समूहका जीतजंग बस्नेत, कृष्ण सिटौला समूहका उत्तम चापागाई. उपाध्यक्ष, पौडेल समूहका शाही महासचिव र खुमबहादुर खड्का समूहका विद्वान गुरुङ कोषाध्यक्ष छन् । केन्द्रीय समितिको कार्यकाल सकिनैलाग्दा समेत कार्यसमिति विस्तार हुन सकेको छैन । 

स्रोतका अनुसार सो बैठकमा तरुण दलका पूर्वअध्यक्ष विनोद कायस्थ, तरूण पूर्व केन्द्रीय सदस्य मेदिनी सिटौला, तरुण नेताहरु हुर्मत न्यौपाने, कमल शाह,दामोदर कोइराला, लक्ष्मी खतिवडासहित करिब ४ दर्जन नेताहरु थिए । उनीहरुले अब पनि पौडेल,कोइराला र सिंह नमिल्ने हो भने अबको महाधिवेशनमा पनि देउवाकै नेतृत्व दोहोरिने भन्दै सचेत गराएका थिए ।

तरुणहरुको चर्को दबाबपछि वरिष्ठ नेता रामचन्द्र पौडेलले तरुण दल गठन गर्दा कमजोरी भएको स्वीकार गरे । “अहिले पार्टी सञ्चालन नियमावली पनि अप्रजातान्त्रिक खालको आएको छ । केन्द्रमा देउवाविरुद्ध हामी लडिरहेका छौं,” पौडेलको भनाई उद्धृत गर्दै एक सहभागीले भने, “जिल्ला र क्षेत्रमा पनि देउवाविरोधीहरुलाई एक ठाउँमा ल्याउनुस् । केन्द्रमा लडेर मात्र पुग्दैन तपाईँहरु जिल्लामा पनि लड्नुस् ।” 

भेलामा सहभागी तरुण दलका पूर्वकेन्द्रीय सदस्यले मेदिनी सिटौलाले भने,"पार्टीलाई देउवा प्रवृतिबाट बचाउन जे-जे त्याग गर्ने हो गर्नुस् । कम्युनिस्टमुक्त नेपाल र देउवाप्रवृतिमुक्त कांग्रेस बनाउन तपाईंहरु एक भएर लड्नुको विकल्प छैन ।"

कोइराला र सिंहले पनि पौडेलले जसरी नै धारणा राखेका थिए ।