दाङ । रुकुम पश्चिमको त्रिवेणि गाउँपालिका जातिय छुवाछुत मुक्त गाउँपालिका घोषणा गरिएको छ । गाउँपालिकामा कुनै पनि खालको जातिय छुवाछुत नरहेको भन्दै प्रमुख जिल्ला अधिकारी शम्भुप्रशाद रेग्मीले गाउँपालिकालाई जातिय छुवाछुत मुक्त घोषणा गरेका हुन ।

गाउँपालिकाका सार्वजनिक धारा, कुवा तथा भौतिक संरचना प्रयोग र प्रवेशमा विभेद नरहेको, सबै जातजातिहरुको मन्दिरमा साझा पहुँच रहेको, जातीय कारणले चुलो, भान्सा तथा खानपानमा छुवाछुत नरहेको कारण गाउँपालिकालाई छुवाछुत मुक्त घोषणा गरिएको गाउँपालिकाले जनाएको छ । 

बाँफिकोट गाउँपालिका जिल्लाको पहिलो स्थानीय तहका रुपमा जातिय छुवाछुत मुक्त घोषणा भएको थियो । त्यस्तै जिल्लाको चौरजहारी नगरपालिका र सानीभेरी गाउँपालिका जातिय छुवाछुत मुक्त घोषणा भइसकेका छन् । त्रिवेणी गाउँपालिका जातिय छुवाछुतमुक्त घोषणा हुने जिल्लाको चौथो स्थानीय तह बनेको छ ।