काठमाडौं । काभ्रेका भिमसेन नेपाल (नाम परिर्वतन)  काठमाडौंमा खुद्रा व्यवसाय गर्छन् । गएको वर्ष उनी पहिलो पटक कोटेश्वरमा मादक पदार्थ सेवन गरी मोटरसाइकल चलाउँदा ट्राफिक कारबाहीमा परे । उनले ट्राफिक प्रहरीले दिने एक घण्टे चेतना कक्षा लिएर एक हजार जरिवाना पनि तिरे । लाइसेन्समा पहिलो प्वाल पर्यो । मादक पदार्थ सेवन गरी सवारी चलाउनु हुँदैन भन्दै एक घण्टे कक्षा लिएका नेपाल फेरि अर्को हप्ता बानेश्वरमा मापसे चेकिङमा परे । तर, पनि उनी चेतेनन् । ट्राफिक प्रहरी महाशाखाको तथ्यांकअनुसार उनी काठमाडौंका विभिन्न स्थानमा गरी ६ पटक मादक पदार्थ सेवन गरी सवारी चलाएको अवस्थामा कारबाहीमा परे । 

काठमाडौंका सुवर्ण कुचिकार (नाम परिर्वतन) पनि गएको कात्तिकमा मादक पदार्थ सेवन गरेर सवारी चलाएको अवस्थामा ट्राफिक कारबाहीमा परे । महाशाखाको तथ्यांकअनुसार उनी फेरि अर्को साता कलंकीमा कारबाहीमा परे, तर पनि चेतेनन् । उनी पनि ६ पटक माद पदार्थ सेवन गरी ट्राफिक कारबाहीमा परेका छन् । 

गोरखाका पदम गुरुङ गएको भदौमा महाराजगन्जमा पहिलो पटक मादक पदार्थ सेवन गरेर सवारी चलाउँदा ट्राफिक कारबाहीमा परे । एक घण्टे चेतना कक्षा र एक हजार जरिवाना तिरेर प्वाल परेको लाइसेन्स बुझेर ट्राफिक प्रहरी महाशाखाबाट बाहिरिएका गुरुङ फेरि अर्को साता बौद्धमा कारबाहीमा परे, तर पनि उनी चेतेनन् । काठमाडौंमा विभिन्न स्थानमा उनी ६ पटक कारबाहीमा परे । 

यी तीनजना त उदाहरणमात्र हुन् । मादक पदार्थ सेवन गरी ६ पटक कारबाहीमा पर्ने १ सय ६१ जना चालकलाई महानगरीय ट्राफिक महाशाखाले लाइसेन्स निलम्बनका लागि यातायात व्यवस्था विभागमा पत्राचार गरेको छ । उनीहरूले अब ६ महिनासम्म लाइसेन्स पाउनेछैनन् । नयाँ लाइसेन्स लिँदा पनि नयाँ प्रक्रिया पूरा गर्नुपर्ने हुन्छ । 

“६ पटकसम्म पनि नचेत्ने चालकको बानी कहिल्यै सुध्रिँदैन । कानुनअनुसार उनीहरूको लाइसेन्स ६ महिनाका लागि निलम्बन हुन्छ । तर, यो कारबाही पनि कम भयो,” महानगरीय ट्राफिक प्रहरी प्रमुख डीआईजी प्रकाश अर्यालले भने । अर्यालका अनुसार निलम्बनमा परेका १ सय ६१ जनालाई महाशाखाका कर्मचारीले पनि राम्रैसँग चिन्न थालिसके । जति गरे पनि नचेत्ने चालकलाई सवारी चलाउन दिन नहुने प्रहरीको भनाइ छ । 

डीआईजी अर्याल भन्छन्, “अधिकांश चालक एक पटक मापसे चेकिङमा परेका हुन्छन् । तर, उनीहरू सचेत भएर मादक पदार्थ सेवन गरी सवारी चलाउँदैनन् । उनीहरूले अरुलाई पनि सचेत गराउँछन् । तर, निलम्बनमा परेका १ सय ६१ जनाले अरुलाई पनि प्वाल पर्दैमा के हुन्छ भन्दै कुबाटोमा लैजाने चेष्टा गरेको भेटियो ।”