काठमाडौं । प्रमुख प्रतिपक्षी दल नेपाली कांग्रेसका शीर्ष नेताहरुको बैठक बिना निष्कर्ष टुंगिएको छ । पार्टीमा चुलिएको असन्तुष्टि साम्य पार्ने उद्देश्यले सभापति शेरबहादुर देउवाले बोलाएको पदाधिकारी र पूर्वपदाधिकारीहरुको बैठक बिना निष्कर्ष टुंगिएको हो । 
केन्द्रीय कार्यसमिति बैठक बस्नुअघि पार्टीमा चुलिएको असन्तुष्टि साम्य पार्ने उद्देश्यले सभापति देउवाले आफूविरुद्ध मोर्चाबन्दीमा लागेका नेताहरुलाई छलफलका लागि बोलाएका थिए । 

बैठकमा पार्टीभित्रको असन्तुष्टि, देशको वस्तुस्थिति, सरकार, संसद र सरकारले ल्याएका विधेयकहरुका बारेमा छलफल भएको बताएको छ । बैठकमा अनुशासन समिति र केन्द्रीय निर्वाचन समिति गठनका बारेमा पनि छलफल भएको नेताहरुले बताएका छन् । 
पदाधिकारी र पूर्वपदाधिकारीहरुको संयुक्त बैठकमा सहभागी नेताहरु पार्टीको केन्द्रीय कार्यसमिति बैठक सुचारु गर्ने र पार्टीको छविमा आघात नपुग्ने गरी अगाडि बढ्नु पर्ने पक्षमा भने देखिएका छन् ।  

‘‘बैठकमा गम्भिरतापूर्वक छलफल गरियो । तर केही निष्कर्ष निस्केन,’’ बैठकमा सहभागी केन्द्रीय सदस्य अर्जुनरसिंह केसीले भने । संस्थापन इतर समूहले सभापति देउवाले सुरु गरेको सहमतिको प्रयासलाई सकारात्मक भनेको छ । 

‘‘सभापतिज्यूले सल्लाह गर्न खोज्नुभयो, यसलाई हामीले पोजेटिभ भनेका छौं । बैठकमा उहाँले सबै कुरा सुन्नभयो तर निष्कर्ष निस्केन,” केसीले भने । संस्थापन इतर समूहले सोमबार बस्ने पार्टीको केन्द्रीय कार्यसमिति बैठकमा सहभागिताका लागि राखेको अडान भने यथावत रहेको जनाएको छ ।      

‘‘सहमतिको प्रयास भोलि पनि हुन्छ । सहमति नभइ यथास्थितिमा बैठकमा सहभागी हुने परिस्थिति भने हुँदैन,” नेता केसीले भने । 

गत फागुन २२ गते केन्द्रीय सदस्य प्रकाशमान सिंहको निवास चाक्सीबारीमा बसेको संस्थापन इतर समूहको बैठकले असहमतिका विषयलाई सभापति देउवाले छलफल गरेर सहमतिमा नटुंग्याएसम्म केन्द्रीय कार्यसमिति बैठकमा सहभागी नहुने निष्कर्ष निकालेको थियो । 

संस्थापन पक्षले भने बैठक सहमति नजिक पुगेको दाबी गरेको छ । बैठकमा अनुशासन समिति र केन्द्रीय निर्वाचन समिति गठनका बारेमा छलफल भएको र आफूहरु सहमति नजिक पुगेको बैठकमा सहभागी केन्द्रीय सदस्य एनपी साउदले जानकारी दिए ।  

‘‘केही कुरो मिल्न बाँकी छ । अनुशासन समितिले निर्णय गर्दा सर्वसम्मत गर्ने कि बहुमतीय प्रक्रियामा गएर गर्ने भन्ने बारेमा कुरो मिलेको छैन,’’ उनले बाह्रखरीसँग भने, ‘‘समिति गठन सर्वसम्मतिले गर्ने विषयमा सबै सहमत छौं । समितिले काम गर्दा सहमतिले नै गर्ने कि प्रक्रियामा गएर गर्ने भन्ने कुरामा केही मतभेद छ ।’’
फाइल तस्बिर