काठमाडौं । नेपाली सेनाले काठमाडौं–तराई–मधेस द्रुतमार्ग निर्माणको कामलाई तिव्रता दिएको छ । सरकारले द्रुतमार्ग निर्माणको जिम्मेवारी २०७४ वैशाख २१ गते नेपाली सेनालाई दिने निर्णय गरेको थियो । 
त्यसपछि सोही वर्षको साउन २७ गते भौतिक पूर्वाधार तथा यातायात मन्त्रालयबाट नेपाली सेनालाई आयोजना हस्तारण गरिएको थियो । २०७४ जेठ १४ गते दु्रतमार्गको शिलान्यास गरिएको थियो । एसियाली मापदण्डअनुसार निर्माण गरिने द्रुतमार्गको लम्बाइ ७६.२ किलोमिटर रहेने छ । दु्रतमार्ग काठमाडौं, ललितपुर, मकवानपुर र बारा गरी चार जिल्लामा निर्माण हुँदैछ ।
कूल ७६.२ किलोमिटर लम्बाइको उक्त राष्ट्रिय गौरवको आयोजनाको काम सेनाले तिव्र गतिमा अघि बढाइरहेको छ । आयोजना निर्माण कार्य ४ वर्षमा सम्पन्न गर्ने लक्ष्यका साथ सेनाले काम गरिरहेको छ । ललितपुरको खोकनाबाट सुरु हुने काठमाडौं–तराई–मधेस द्रुतमार्ग बाराको निजगढमा पुगी अन्त हुनेछ । 
सेनाले अहिले खोकनादेखि निजगढसम्म माटो–ढुंगा काट्ने र पुर्ने काम गरिरहेको छ । यी कार्य गर्नको लागि द्रुतमार्गको प्रत्येक ८–९ किलोमिटरमा क्याम्प खडा गरेको छ । कामलाई तिव्रता दिन सेनाले आउँदो साताबाट डबल सिफ्टमा काम गर्ने योजना बनाएको छ । दु्रतमार्ग एसियन मापदण्ड अनुसार ४ लेनको हुनेछ । 
चालु आर्थिक वर्षको लागि सरकारले द्रतमार्गको लागि १५ अर्ब ३९ करोड ७८ लाख रुपैयाँ बजेट छुट्टयाएको छ । सरकारले आर्थिक वर्ष २०७४–०७५ मा दु्रतमार्गको लागि ९ अर्ब ४० करोड रुपैयाँ बजेट विनियोजन गरेकोमा ८ अर्ब ९७ करोड रुपैयाँ खर्च भएको थियो । 
द्रुतमार्गमा पर्ने काठमाडौंको पाखाचोक देखि मकवानपुरको सिस्नेरी सडक खण्डको स्थलगत अवलोकनका क्रममा खिचिएका केही तस्बिरः