काठमाडौं । राष्ट्रिय ट्रमा सेन्टरको आकस्मिक कक्षमा उपचार गराउन आउने बिरामीको संख्या घट्दै गएको छ । राष्ट्रिय ट्रमा सेन्टरको मेडिकल रेर्कड अधिकृत अर्जुनप्रसाद भेटुवालका अनुसार आर्थिक वर्ष २०७२/७३ मा ५ हजार ४७७ घाइतेले आकस्मिक कक्षमा उपचार गराएका थिए । ०७१/७२ मा ७ हजार ४४४ जना घाइतेले उपचार गराएका थिए । तथ्यांकले करिव दुई हजारले बिरामीको संख्या घटेको देखाएको  छ ।

भूकम्पका बेला उपचारका लागि आउने घाइतेको संख्या बढी भएपनि हाल बिरामीको संख्या कमहुँदै गएको भेटवालले बताए । 

आकस्मिक कक्षमा आउने बिरामीको संख्या घटेपनि ओपीडीमा आउने बिरामीको संख्या भने बढेको अधिकृत भेटवालले जानकारी दिए । उनका अनुसार आर्थिक वर्ष २०७२/७३ मा २९ हजार ८१५ जनाले उपचार गराएका छन् । गत वर्षको तुलनामा १७ हजार ४९८ ले बिरामी बढेका छन् । आर्थिक वर्ष २०७१/७२ मा १० हजार ३५६ जना बिरामीले उपचार गराएका थिए । 

आकस्मिक दुर्घटनाका घाइतेको उपचार गर्ने उद्देश्यले भूकम्पको समयमा ट्रमा सेन्टर सञ्चालनमा ल्याएको हो । सेन्टरले आर्थिक वर्ष २०७२/७३ मा ३ हजार ७११ जना अस्पतालमा भर्ना भएका थिए भने २०७१/७२ मा २ हजार ७१ जना भर्ना भएर उपचार गराएका थिए । 

सेन्टर स्थापना भएको अवधि देखि हालसम्म ५६ हजार ८७४ सेवा उपलब्ध गराएको छ । भूकम्पको बेला भारतीय प्रधानमन्त्री नरेन्द्र मोदीले प्रधानमन्त्री सुशील कोइरालालाई हस्तान्तरण गरेपछि औपचारिक रुपमा सेन्टर सञ्चालनमा आएको थियो ।  

दक्षिण एसियामै नमुना सेन्टर बनाउने सोचले १८ वर्षअघि तत्कालीन भारतीय र नेपालाका प्रधानमन्त्रीले १९९७ जुन ६ मा शिलान्यास गरेका थिए । शिलान्यास भएको करिब छ वर्षपछि सन् २००३ मा दुवै देशबीच ट्रमा सेन्टर निर्माण गर्ने सहमति भएको थियो ।

के हो ट्रमा सेन्टर ?

हाडजोर्नीसम्बन्धी चोटपटक लागेका बिरामीको उपचार गर्ने ठाउँ नै ट्रमा सेन्टर हो । सेन्टरमा दुर्घटना वा अन्य कुनै कारण चोट लागेका बिरामीलाई आपत्कालीन उपचार गरिन्छ । ट्रमामा पूर्ण विशेषज्ञ सेवा दिइने भएकाले हाडजोर्नी तथा नशा, मुटु शल्यचिकित्सक, प्लास्टिक सर्जन, नाक, कान घाँटी र दन्त शल्य चिकित्सकको समूह आवश्यक हुन्छ । २ सय शैयाको सेन्टर रहेको छ । 

ट्रमा सेन्टरको अवधारणा 

ट्रमाको अवधारणा अमेरिकाको क्युबेन सहरबाट सुरु भएको हो । राम्रो ट्रमा सेन्टर भएमा दुर्घटनामा परेकाहरूको मृत्युदर कम गर्न सकिन्छ ।

नेपालमा दुर्घटनामा परेर मृत्यु हुनेमा पाँच देखि ४४ वर्ष उमेरका मानिस बढी रहेको तथ्यांक छ । नेपालमा बढ्दै गएको सवारी दुर्घटनालाई हेर्दा सन् २०२० सम्ममा मृत्युको तेस्रो कारण सवारी दुर्घटना बन्न सक्ने स्वास्थ्य मन्त्रालयको अनुमान छ ।

अहिले सवारी दुर्घटना नेपालमा मृत्युको चौथो कारण बनेको छ । नेपालमा सडक दुर्घटनाका कारण दैनिक ५ जनाको मृत्यु तथा १२ जनाभन्दा बढी गम्भीर घाइते हुने गरको बताइएको छ । नेपालमा बढ्दो सवारी दुर्घटनाबाट हुने मृत्युको संख्या कम गर्ने उद्देश्यले सेन्टर सञ्चालनमा ल्याइएको हो ।