काठमाडौँ । कप्तान क्रिष्टियानो रोनाल्डोले दुई गोल गरेपछि पोर्चुगलले विश्वकप छनोटमा प्रभावशाली जित निकालेको छ । सन् २०१८ मा रुसमा हुने विश्वकपको युरोपियन छनोट अन्तर्गत आइतबार राती रोनाल्डो प्रेणित पोर्चुगलले  लात्भियालाई ४–१ ले पराजित गरेको हो ।

घरेलु मैदानमा भएको खेलमा पोर्चुगललाई जिताउन कप्तान रोनाल्डोले दुई तथा विलियम कार्वाल्हो र ब्रुनो अल्वेसले एक एक गोल गरे । तर, खेलमा रोनाल्डोले एक पेनाल्टीमा भने गोल गर्न असफल भए । लात्भियाका लागि अ्रटुर्स जिजन्सले एक गोल फर्काए । 

लात्भियामाथी एकतर्फी खेल खेलेको पोर्चुगलले खेलको २८ औं मिनेटमा रोनाल्डोको पेनाल्टी गोलबाट अग्रता लिएको थियो । पहिलो हाफमा १–० को अग्रता लिएको पोर्चुगलले दोस्रो हाफको सुरुमा अग्रत दोब्बर बनाउने मौका पायो । तर, लात्भियाका खेलाडीले फल गरेपछि पाएको पेनाल्टीलाई रोनाल्डोले गोल गर्नबाट चुके । खेलको ६७ औं मिनेटमा लात्भियाका जिजन्सले एक गोल गर्दै खेल बराबरीमा ल्याए । तर, त्यसको दुई मिनेटपछि कार्वाल्होले गोल गर्दै पोर्चुगललाई पुन अग्रता लिाए । ८५ औं मिनेटमा रोनाल्डोले सुन्दर भली गोल गर्दै पोर्चुगलको अग्रता ३–१ मा पुर्‍याए । त्यसपछि इन्जुरी समयमा अल्वेसले थप गोल गरेपछि पोर्चुगलले ४–१ को जित पायो । 

जितसंगै समूह ‘बी’ मा ९ अंक जोडेको पोर्चुगल दोस्रो स्थानमा छ  । समुह बि अन्तर्गत नै भएको आइतबार राती फारोइ आइल्याण्डलाई २–० ले पराजित गरेको स्वीट्जरल्याण्ड शिर्ष स्थानमा छ । र,  लगातार चार खेल जितेको स्वीट्जरल्याण्डले  १२ अंक जोडेको छ । यस्तै ९ अंकसहित पोर्चुगल दोस्रो स्थानमा छ । 

विश्वकप छनोट अन्तर्गत समूह ए को खेलमा आइतबार राती नेदरल्याण्डसले लग्जेम्बर्गलाई ३–१ ले पराजित गरेको छ । जितसंगै नेदरल्याण्डस ७ अंक जोडेर समुहको दोस्रो स्थानमा उक्लेको छ । समुह ए मा १० अंक जोडेर फ्रान्स शिर्ष स्थानमा छ ।