काठमाडौँ । विश्वकप छनोटमा बेल्जियमले इस्टोनियामाथी फराकिलो जित निकालेको छ ।  सन् २०१८ मा रुसमा हुने विश्वकपको युरोपियन छनोट अन्तर्गत आइतबार राती बेल्जियमले इस्टोनियालाई ८– १ ले पराजित गरेको हो ।

घरेलु मैदानमा भएको खेलमा बेल्जियमलाई जिताउन रामेलु लुकाकु र ड्राइज मार्टेन्जले  समान दुई दुई गोल गर्दा इडन हर्जाड, थोमस मुनिएर र यानिक काररास्कोले एक एक गोल गरे । यस्तै  इस्टोनियाका राग्नर क्लावनले आत्मघाती गोल गरे भने इस्टोनियाका लागि हेनरी आनिएरले एक गोल फर्काए । 

युरोपियन छनोटको समूह ‘एच’  अन्तर्गतको खेलमा बेल्जियमले आठौं मिनेटमा नै मुनिएरको गोलबाट  सुरुवाति अग्रता लिएको थियो । १६ औं मिनेटमा मार्टेन्ज र २५ औं मिनेटमा हजार्डले गोल गर्दै अग्रता बेल्जियमको अग्रता ३–० मा पुर्‍याए । तर, २९ औं मिनेटमा इस्टोनियाका आनिएरले एक गोल गरेपछि पहिलो हाफमा बेल्जियमले ३–१ को अग्रता लियो । 

बेल्जियमले दोस्रो हाफमा पनि गोल वर्षा नै गर्यो । खेलको ६२ औं मिनेटमा काररास्कोले गोल गरे भने त्यसको दुई मिनेटपछि इस्टोनियाका क्लावनले आत्मघाती गोल गरेपछि बेल्जियमले आफ्नो अग्रता थप फराकिलो बनायो । ६७ औं मिनेटमा मार्टेन्जले व्यक्तिगत दोस्रो गोल गरेपछि बेल्जियमको अग्रता ६–१ मा पुग्यो । त्यसपछि ८३ र ८८ औं मिनेटमा गरि लुकाकुले दुई गोल गरेपछि बेल्जियमले ८–१ को फराकिलो निकाल्न सफल भयो । 

इस्टोनियामाथिको जितपछि ४ खेलबाट १२ अंक भएको बेल्जियम समूहको शीर्ष स्थानमा छ । र, विश्वकपमा  छनोट हुने सम्भावना बलियो बनाएको छ । पराजित इस्टोनिया ३ अंक जोडेर पाचौ स्थानमा छ । आइतबार  राति नै भएको खेलमा बोसनिया हर्जगोभिनासँग १–१ को बराबरी रोकिएको ग्रिस चार खेलबाट १० अंकसहित दोस्रो स्थानमा छ । समूह ‘एच’ कै अर्को खेलमा साइप्रसले जिब्रालटारलाई ३–१ ले पराजित गर्यो ।