काठमाडौँ । इंग्ल्यान्ड र भारतबीचको पहिलो टेस्ट बराबरीमा सकिएको छ । भारतको राजकोटमा पहिलो टेस्टको पाँचाँै तथा अन्तिम दिनको खेल सकिँदा घरेलु टोली भारतले ६ विकेट गुमाएर १ सय ५२ रन बनाएपछि खेल बराबरीमा सकिएको हो ।

राजकोटमा इंग्ल्यान्डले दिएको ३ सय १० रनको लक्ष्य पछ्याएको भारतले दोस्रो पारीमा आफ्नो विकेट जोगाउदै अलआउट हुनबाट बच्दै खेल बराबरी गरेको हो । एक समय खेल गुमाइसकेको भारतका लागि बिराट कोहली र रविन्द्र जडेजाले अविजित रहदै खेल बराबरीमा ल्याएका हुन् । कोहलीले अविजित ४९ रन बनाए भने जडेजाले पनि अविजित ३२ रनमा बनाए । दोस्रो पारीमा भारतका विजय मुरली ३१ तथा रविचन्द्र अश्विनी ३२ रनमा जोडे । इंग्ल्यान्डका अदिल रशिदले तीन विकेट लिए ।

यसअघि इंग्ल्यान्डले आफ्नो दोस्रो पारीमा ३ विकेटको क्षतिमा २ सय ६० रन बनाएपछि पारी समाप्तीको घोषणा गर्दै भारतसामू ३ सय १० रनको लक्ष्य दिएको थियो । दोस्रो पारीमा इंग्ल्यान्डका एलेस्टर कुकले १ सय ३० रन तथा हासिब हमेदले ८२ रन जोडे । भारतका अमित मिश्रले दुई विकेट लिए ।

पहिलो पारीमा जोय रुट, बेन स्टोक र मोइन अलीले शतकीय पारी खेलेपछि इंग्ल्यान्डले ५ सय ३७ रन बनाएको थियो । पहिलो पारीमा विजय मुरली र चेतेश्वर पुजाराले शतकीय पारी खेलेपछि भारतले ४ सय ८८ रन बनाएको थियो ।

पहिलो टेस्ट ड्र संगै पाँच खेलको श्रृखला पनि बराबरीमा रहेको छ । दुई टोलीबीचको दोस्रो टेस्ट विशाखापत्तनम आगामी मंगलबार सुरु हुनेछ ।