काठमाडौं । अमेरिकामा आठ नोभेम्बरमा हुन लागेको राष्ट्रपति चुनावमा डेमोक्रेटिक पार्टीकी उमेदवार हिलारी क्लिन्टनले अब प्रतिद्वन्द्वी रिपब्लिकन पार्टीका डोनाल्ड ट्रम्पको टिप्पणीको कुनै वास्ता नगरी मुद्दाहरुमा ध्यान दिने बताएको बीबीसीले जनाएको छ ।

“मैले ट्रम्पसँग साढे चार घण्टा बहस गरिसकेको छु । अब उनलाई अझै केही जवाफ दिनुपर्छ जस्तो लाग्दैन,’’ पत्रकारहरुसँग कुरा गर्दै क्लिन्टनले भनिन् ।

उता रिपब्लिकन उमेदवार डोनाल्ड ट्रम्पले उनीविरुद्ध यौन उत्पीडनको आरोप लगाउने महिलाहरुविरुद्ध चुनाव सम्पन्न भएपछि अदालतमार्फत चुनौती दिने बताएका छन् ।

यसबारेमा हिलारीको प्रतिक्रिया थियो, “उनी जे मन लाग्छ त्यो बोल्न सक्छन । जसरी चाहन्छन् त्यसरी आफनो चुनाव अभियान चलाउन सक्छन । म त्यो अमेरिकी जनतालाई नै छाड्छु ।’’

महिलाविरुद्धमा अभद्र टिप्पणीयुक्त भिडियो बाहिर आएपछि चुनावमा पछाडि परेका रिपब्लकिन पार्टीका उमेदवार डोनाल्ड ट्रम्पले पूर्व राष्ट्रपति अब्राहम लिंकनको प्रसँग लिँदै हिलारीको आलेचना गरेका छन ।

समाचार एजेन्सी एएफपीका अनुसार पेन्सलभेनिया राज्यमा सम्बोधन गर्दै भनेका छन्, “क्लिन्टन मेराविरुद्ध लडेकी हैनन्, परिवर्तनको विरुद्ध लडेकी हुन् ।’’