काठमाडौं । मानव अधिकार तथा शान्ति समाजले शिक्षा मन्त्री धनिराम पौडेललाई शिक्षाको अधिकारका लागि १० बुँदे अवधारणा पत्र बुझाएको छ । 

समाजका सभापति गंगाधर अधिकारीको नेतृत्वमा गएको टोली आइतबार अवधारण पत्र बुझाएको हो । अवधारण पत्र बुझ्दै मन्त्री पौडेलले शिक्षा क्षेत्र सुधारका लागि निर्माण गरिएका संवैधानिक व्यवस्थालाई कार्यान्वयनको लागि पहल गर्ने प्रतिवद्धता जनाए । शिक्षालाई नैसर्गिक अधिकारको रुपमा हेर्नुपर्ने बताउँदै उनले तराइका केही जिल्लामा दिवा खानाको रुपमा कार्यक्रम सञ्चालन गर्ने तयारी भइरहेको जानकारी दिए । सुदुरपश्चिम तथा मध्यपश्चिमका केही जिल्लामा सञ्चालन गरिएको उक्त कार्यक्रमले शिक्षा क्षेत्रमा सुधार आएको उनले बताए । उनले बाल श्रमको अन्त्य गरे विद्यालयलाई शान्ति क्षेत्र बनाउन सक्दो पहल गर्ने बताए । 

समाजको अवधारणा पत्रमा सुलभ, गुणस्तरीय, वैज्ञानिक शिक्षा राज्यको प्राथमिकता हुनुपर्ने, पाठ्यक्रममा मानव अधिकार तथा शान्ति शिक्षा अनिवार्य रुपमा समावेश हुनुपर्ने लगायतका माग गरिएको छ ।