काठमाडौं । बलिउड सुपरस्टार सलमान खानले भारतीय फिल्म उद्योगमा काम गर्ने पाकिस्तानी कलाकारहरु आतंककारी नभएको  बताएका छन् ।

“आतंककारी भए उनीहरुविरुद्ध कारवाही गर्दा ठिकै हुन्थ्यो तर उनीहरु आतंककारी होइनन,” खानले भने । खानले कलाकार भएको र सरकारले भिसा तथा अनुमति दिएको हुँदा भारत आएको हालै आयोजना गरेको एक पत्रकार सम्मेलनमा बताएका हुन ।

उनले यो प्रतिकृया महाराष्ट्र राज्यको महाराष्ट्र नवनिर्माण सेनाको फिल्म कर्मचारी सम्बद्ध संगठनले पाकिस्तानका कलाकार संलग्न भएका कुनै पनि फिल्म चल्न नदिने बताएपछि आएको हो । उनले दुई देशबीच शान्तिपुर्ण सम्बन्ध हुनुपर्ने बताएको टाइम्स अफ इन्डियाले जनाएको छ ।

हालै भारत नियन्त्रित काश्मिरको उरीमा भएको आतंकाकारी हमलामा १८ भारतीय सेनाको मृत्यु भएपछि विरोधस्वरुप पाकिस्तानी कलाकारहरुलाई निसाना बनाइएको थियो ।