काठमाडौं । दोस्रो नेपाल कप ए साइड फुटबल प्रतियोगिता शनिबारबाट सुरु हुने भएको छ । आयोजक मनाङ मर्स्याङ्दी फुटबल क्लबले राजधानी शुक्रबार पत्रकार सम्मेलन गर्दै प्रतियोगिताको तयारी पूरा भएको जनाएको हो ।

दुई दिने प्रतियोगिता लगनखेलस्थित सैनिक शारीरिक प्रशिक्षण तथा खेलकुद केन्द्रमा हुने प्रतियोगिता संयोजक पिटरले जानकारी दिए । प्रतियोगितामा १३ टिमको सहभागिता रहनेछ । जसमा चार टोली विदेशी टिमको सहभागिता रहनेछ । लिगकम नकआउटको आधारमा सञ्चालन हुने प्रतियोगितामा सहभागी टोलीलाई ३ समूहमा बिभाजन गरिएको छ । जसमा शीर्ष ६ टोलीले नेपाल कपको लागि भिड्ने छन् भने बाँकी ७ टिमले प्लेट च्याम्पियनसिप खेल्नेछ ।

प्रतियोगिताको बिजेताले ट्रफी तथा गिफ्ट ह्याम्पर पाउने छन् । च्यारिटी प्रतियोगिता भएकोले बिजेतालाई नगद पुरस्कार दिइने छैन । प्रतियोगिताबाट उठेको रकम भूकम्प प्रभावित जिल्लाको स्कुल निर्माणमा सहयोग गरिने आयोजकले जनाएको छ । त्यस्तै आयोजकले अघिल्लो सस्करणबाट उठेको रकमले हाल दोलखा जिल्लाको जगतस्थित अन्नपूर्ण हायर सेकेन्डरी स्कुलको भवन  निर्माण भैरहेको जनाएको छ ।