काठमाडौं । पाकिस्तानबाट हुने सम्भावित आक्रमणलाई ध्यान दिइ भारतीय सेनाले पन्जाब पठानकोटका गाउँहरु खाली गराएको छ । भारतले बिहीबार राती पाकिस्तानमा प्रवेश गरी २ जना पाकिस्तानी सेना र स्थानीयको हत्या गरेपछि सम्भावित प्रतिकारलाई लिएर भारतीय सेनाले सो कदम उठाएको भारतीय सञ्चारमाध्यमले जनाएका छन् । 

भारतको उरीमा हमला भएको ठीक १० दिनपछि भारतले पाकिस्तानको सीमाभित्र प्रवेश गरी पाकिस्तानी नागरिक र सेनाको हत्या गरेको हो । भारतीय सञ्चारमाध्यम हिन्दुस्तान टाइम्सले १ सय ५० जना भारतीय सैनिक प्रवेश गरी ३८ जना सर्वसाधारणको हत्या गरेको बताएको छ । 

भारतीय सेनाले पाकिस्तानमाथि गरेको आक्रमणलाई ‘सर्जिकल स्ट्राइक’को नाम दिएको छ । सामान्य नागरिक, कुनै पनि घर वा यातायातमा क्षति नपु¥याई गरिने सैनिक आक्रमणलाई  ‘सर्जिकल स्ट्राइक’ भनिन्छ । भारतीय सेनाले ‘सर्जिकल स्ट्राइक’ भने पनि पाकिस्तानले त्यसको प्रतिवाद गरेको छ । पाकिस्तानले भनेको छ–“भारतीय सेनाले सुतेको बेला जानी जानी हमला गरी सर्वसाधारणको समेत हत्या गरेको छ ।” 

पाकिस्तानका रक्षामन्त्री खवाजा आसिफले भारतीय आक्रमणबाट २ जना पाकिस्तानी सैनिकको मृत्यु भएको र ९ जना घाइते भएको बताएका छन् । उनले पाकिस्तानी सेनाले भारतीय सेनाको आक्रमणको जवाफि प्रतिकार गरेको समेत बताए । उनले रातको अँध्यारो र सुतिरहेको बेला आक्रमण गरेको बताउँदै सर्जिकल स्ट्राइक गरेको भनेर नाटकको मञ्चन गरेको आरोप लगाए । पाकिस्तानी मिडियासँग कुरा गर्दै उनले भारतले नियोजित रुपमा बिहानी समयमा आक्रमण गरेको आरोप लगाएका छन् । केही दिनदेखि भारतले आफ्नो मिडिया र नागरिकलाई सन्तुष्ट पार्न आक्रमण गरेको आरोप लगाएका हुन् । आसिफले फेरी भारतबाट क्रस बोर्डर फायर भएमा पाकिस्तानले यसको जवाफ दिने उनले चेतावनी दिएका छन् ।  

भारतीय मिडियाले पाकिस्तानमाथि आक्रमण गरेको घटनालाई एउटा पर्वको रुपमा प्रस्तुत गरेको छ । भारतीय टेलिभिजन च्यानल आजतक, एबिपि लगायत अधिकांस च्यानले भारतले यसअघि नै गर्नु र्ने हमला ढिलो गरेको भनेर आक्रमणलाई प्रोत्साहित गरेका छन् । 

पाकिस्तानी मिडियाले भने भारतले जनतालाई खुसि पार्न मात्र आक्रमण गरेको बताएको छ । पाकिस्तानी मिडियाले भारतको आक्रमणलाई ज्यादती भनेको छ । पाकिस्तानी टेलिभिजन च्यानल नेयोले भारतले जति ज्यादती गरे पनि काश्मिरलाई भारतबाट मुक्त गरि छोड्ने बताउँदै कार्यक्रम नै चलाएको छ ।  भारतीय मिडियाले भारतीयहरुले पटाका पड्काउदै गरेको दृश्य देखाएको छ भने पाकिस्तानी टेलिभिजनले भारतीय विरुद्ध नाराबाजि गरिरहेको दृश्य देखाइरहेको छ । भारतद्धारा मारिएका  पाकिस्तानी सेना इम्तियाद अहमदका बाबुले आफ्ना ५ सन्तान भएको र सबैभन्दा सानो छोरोले देशको लागि बलिदान दिएको बताए ।