एजेन्सी । इन्टरनेसनल च्याम्पियन्स कप फुटबलमा फ्रान्सेली टिम पेरिस सेन्ट जर्मेन (पीएसजी) पराजित भएको छ । जर्मनीका क्लब बार्यन म्युनिखसँग पीएसजी ३–१ गोलअन्तरले पराजित भएको हो ।
स्टार खेलाडी नेयमार, इडिशन काभनी लगायतका खेलाडीविनै खेलेको पीएसजीले बार्यन म्युनिखसँग पराजित हुन पुगेको हो । खेलको ३१ औ मिनेटमा टिमोथी वाहले गोल गर्दै पीएसजीलाई अग्रता दिलाएका थिए । तर, पीएसजीले आफ्नो अग्रतालाई जोगाउन सकेनन् । पहिलो हाफसम्म १–० गोलले अघि रहेपनि दोस्रो हाफमा भने पीएसजीले ३ गोल खान पुग्यो ।
खेलको ६०औं मिनेटमा जाभी मार्टिनेजले गोल गर्दै १–१ गोलको बराबरी दिलाएका थिए । त्यसको ८ मिनेटपछि नै खेलको ६८ औ मिनेटमा रेनेटो साञ्चेजले गोल गर्दै बार्यनलाई २–१ गोलको अग्रता दिलाएका थिए ।
दोस्रो हाफमा एकपछि अर्को आक्रामक खेल खेलेको बार्यनले खेलको ७८ औं मिनेटमा अर्को गोल गर्न सफल भए । यसबेला बार्यनका जोसु जिक्र्जीले गोल गर्दै ३–१ गोलको अग्रता दिलाएका थिए । बाँकी समयमा गोल हुन नसकेपछि पीएसजी बार्यनसँग ३–१ गोलले पराजित भएको हो ।
