काठमाडौं । इन्डियन प्रियिमर लिगमा (आईपीएल)मा घरेलु टोली सनराइजर्स हैदराबादले राजस्थान रोयल्सविरुद्ध एक रनको रोमाञ्चक जित निकालेको छ ।

बिहीबार राजीव गान्धी क्रिकेट मैदानमा हैदराबादले प्रस्तुत गरेको २०२ रनको लक्ष्य पछ्याउने क्रममा राजस्थानले २० ओभर नै ब्याटिङ गरे पनि सात विकेट गुमाएर २०० रन मात्र बनायो ।

राजस्थानका रियान परागले ४९ बलमा आठ चौका र चार छक्कासहित सर्वाधिक ७७ रन बनाए पनि हार टार्न सकेनन् । यशस्वी जैसवालले ४० बलमा सात चौका र दुई छक्कासहित ६७, रोभमन पावेलले २७ र सिम्रन हेटमायरले १३ रन जोडे ।

हैदराबादका भुवनेश्वर कुमारले तीन विकेट लिए । कप्तान प्याट कुमिन्स र थंगारसु नटराजनले समान दुई विकेट लिए ।

त्यसअघि, टस जितेर ब्याटिङ रोजेको हैदराबादले २० ओभरमा तीन विकेट गुमाएर २०१ रन बनाएको थियो ।

हैदराबादका नितिश रेड्डीले ४२ बलमा आठ छक्का र तीन चौकासहित सर्वाधिक ७६ रन बनाए । ट्राभिस हेडले ४४ बलमा ६ चौका र तीन छक्कासहित ५८, हेनरिक क्लासेनले अविजित ४२ र अभिषेक शर्माले १२ रन बनाए ।

राजस्थानका आवेश खानले दुई विकेट लिए । सन्दीप शर्माले एक विकेट लिए ।

जितसँगै १० खेलबाट १२ अंक जोेडेको हैदराबाद चौथो स्थानमा उक्लिएको छ । समान खेलबाट १६ अंकको राजस्थान शीर्ष स्थानमा यथावत् छ ।