काठमाडौं । जापान पठाइदिने भन्दै एक सयभन्दा बढी व्यक्तिबाट दुई करोड ६८ लाख रुपैयाँ ठगी गर्ने कन्सलटेन्सी सञ्चालक पक्राउ परेका छन् । पक्राउ पर्नेमा रामेछापको लिखु तामाकोसीका नारायण राई बताउने राजन श्रेष्ठ र झापाको गौराहदका पर्वराज पाण्डे भन्ने इश्वरी पाण्डे पक्राउ परेका छन् ।

राजनले सञ्चालन गरेको नियोनी एजुकेसन कन्सलटेन्सीमार्फत् विद्यार्थी तथा वर्किङ भिसामा जापान पठाउने भन्दै प्रतिव्यक्ति चार लाखदेखि सात लाख रुपैयाँसम्म उठाएको खुलेको छ । उनीहरूलाई उपत्यका अपराध अनुसन्धान कार्यालयको टोलीले पक्राउ गरेको हो । पक्राउ परेका इश्वरीले पर्वराजको नागरिकता दुरुपयोग गरेर बैंक खाता खोलेको खुलेको छ ।

त्यस्तै, नारायणको नागरिकता समेत राजनले दुरुपयोग गरेर खाता खोलेको खुलेको छ । पीडितलाई सोही बैंक खातामा रकम जम्मा गर्न लगाएर ठगी गरेको प्रहरी अनुसन्धानबाट खुलेको हो । उनीहरूलाई कार्यालयका डीएसपी गोविन्द पन्थी र प्रहरी निरीक्षक निर्मल थापा नेतृत्वको टोलीले विशेष अनुसन्धानपछि पक्राउ गरेको हो । नारायणको हराएको नागरिकता फेला पारेर राजनले बैंक खाता खोलेको खुलेको छ ।

उनीहरूले लामो समयदेखि ठगी गर्ने उदेश्यले नै अर्काको नागरिकता दुरुपयोग गरेर खाता खोलेको देखिएको छ । पक्राउ परेकालाई शुक्रबार कार्यालयले सार्वजनिक गरेको छ । उनीहरूमाथि थप अनुसन्धान हुने कार्यालयका प्रमुख एसएसपी सानुराम भट्टराईले जानकारी दिए ।