काठमाडौं । चौथो खेलमा २८ रनको जित निकाल्दै नेपालसँगको ट्वान्टी–२० शृंखला अन्तिम खेलअगावै वेस्ट इन्डिज ‘ए’ ले जितेको छ ।
बिहीबार कीर्तिपुरस्थित त्रिवि क्रिकेट मैदानमा भएको खेलमा वेस्ट इन्डिजले प्रस्तुत गरेको २१० रनको लक्ष्य पछ्याउने क्रममा नेपालले निर्धारित २० ओभर खेले पनि १८१ रनमात्र बनाउन सक्यो । जितसँगै वेस्ट इन्डिजले ३–१ को अग्रतासहित शृंखला पक्का गरेको हो । अब यी दुई टिमबीचको अन्तिम खेल शनिबार हुनेछ ।
नेपालका कप्तान रोहितकुमार पौडेलले ८२ रन बनाए पनि टिमको हार टार्न सकेनन् । उनले ४७ बलमा सात चौका र पाँच छक्का प्रहार गरे । यसबाहेक, सन्दीप जोरा, दीपेन्द्रसिंह ऐरी र गुल्सन झाले समान १९ रन बनाए । अभिनाश बोहराले १७ रन जोडे ।
वेस्ट इन्डिजका म्याथ्यु फार्डे र हाइदेन वाल्सले समान तीन विकेट लिए । गुडाकेस मोटी र फाबियन एलनले समान दुई विकेट हात पारे ।
त्यसअघि टस जितेर पहिले ब्याटिङ गरेको वेस्ट इन्डिजले निर्धारित २० ओभरमा तीन विकेट गुमाएर २०९ रन बनाएको थियो ।
वेस्ट इन्डिजका फ्लेचरले सर्वाधिक ८४ रन बनाए । उनले ४६ बलमा आठ चौका र ६ छक्का प्रहार गरे । ९–१ को अवस्थामा ब्याटिङका लागि आएका फ्लेचरले दोस्रो विकेटका लागि जोनसन चार्ल्ससँग ९२ रनको साझेदारी गरेका थिए ।
चार्ल्सले ३० बलमा तीन चौका र ६ छक्कासहित ५८ रन बनाए । फाबियन एलनले १९ बलमा दुई चौका र तीन छक्कासहित ३३ रन थपे ।
नेपालका कुशल भुर्तेलले दुई र प्रतिश जिसीले एक विकेट लिए । नेपालले यसअघि तीनमध्ये दुई खेलमा हार र एक खेलमा जित निकालेको थियो । शृंखलाको पहिलो खेलमा नेपाल चार विकेटले विजयी हुँदा दोस्रो खेलमा १० रन र तेस्रो खेलमा ७६ रनले पराजित भएको थियो ।
