काठमाडौं । नेपाल लाइफ इन्स्योरेन्स कम्पनीले आफ्नो चुक्तापुँजी ४ अर्ब ३९ करोड पुर्याएको छ । नेपालका अधिकांश बीमा कम्पनीलाई बीमा समितिले तोकेको न्यूनतम चुक्तापूँजी पुर्याउन हम्मेहम्मे भएको बेलामा नेपाल लाइफ इन्स्योरेन्स कम्पनी भने २ अर्ब ३९ रुपैयाँ बढी चुक्तापुँजी पुर्याएको हो ।
समितिको २ बीमा कम्पनीहरुलाई २ अर्ब रुपैयाँ चुक्तपुँजी पुर्याउन दिएको निर्देशनभन्दा नै चुक्तापुँजी पुर्याउने कम्पनी आफू रहेको बताउँदै कम्पनीले आफू नेपालका बीमा कम्पनीहरुमध्ये अग्रस्थानमा उभिएको दावी गरेको छ । कम्पनीले भनेको छ, “समितिको निर्देशन पालना गर्नका लागि अधिकाशं बिमा कम्पनीले हकप्रद सेयरको साहारा लिनुपरेको थियो तैपनि उनीहरुले समितिले तोके बमोजिमको चुक्ता पुँजी पुर्याउन सकेका थिएनन् । तर, नेपाल लाइफ इन्स्योरेन्स कम्पनीले बीमा समितिको निर्देशन आउनु भन्दा पहिले नै २ अर्बभन्दा बढी पुँजी पुर्याइसकेको थियो ।”
कम्पनीमा हालसम्म देश र विदेश गरी २४ लाखभन्दा बढी बीमित भइसकेका छन् । यिनै तथ्यांकका माझ कम्पनीलाई नेपाली बीमा बजारमा सर्वाधिक लोकप्रिय बीमा कम्पनी मानिएको कम्पनीको दावी छ ।
कम्पनीले हाल आफ्ना सेवाग्राही तथा ग्राहकका लागि देशभर फैलिएका आफ्ना १२५ भन्दा बढी शाखा तथा उपशाखामार्फत जीवन बीमासम्बन्धी सम्पूर्ण सेवा उपलब्ध गराइरहेको छ । यसका साथै कम्पनीले आफ्ना शेयरधनीलाई प्रतिहजार ६५ देखि ८२ रुपैयाँसम्म बोनस दिई बीमा क्षेत्रमै सबैभन्दा उत्कृष्ट बोनस दिने अग्रणी इन्स्योरेन्स कम्पनीको रूपमा आफूलाई उभ्याएको कम्पनीले दावी गरेको छ ।
कम्पनीको वार्षिक कुल बीमा शुल्क १४ अर्ब रुपैयाँ रहेको छ भने कम्पनीले हालसम्म १३ अर्ब बीमा दाबी भुक्तानी गरिसकेको छ । कम्पनीको अहिलसम्म ९० हजार जना प्रशिक्षित अभिकर्ता रहेका छन् ।
यसैकारण नेपालको बीमा बजारमा एकतिहाइ बजार हिस्सा ओगटेको कम्पनीको बताउँछ । उसले विज्ञप्तिमा भनेको छ, “नेपाल लाइफ इन्स्योरेन्स कम्पनी पूँजी तथा बजारको हिसाबले नेपालमै पहिलो र सबैभन्दा ठूलो बीमा कम्पनी हो । अधिकृत पूँजी ८ अर्ब रुपैयाँ रहेको नेपाल लाइफ इन्स्योरेन्स कम्पनीको लगानी रु ५७ अर्ब रुपैयाँ रहेको छ भने जीवन बीमाकोष ५० अर्ब रुपैयाँ रहेको छ ।”
कम्पनीले सन् २०१३, २०१४, २०१६ र २०१७ मा गरी चार पटक न्यू बिजनेस एज प्रालिले प्रदान गर्ने “बेस्ट म्यानेजमेन्ट अवार्ड” प्राप्त गरिसकेको छ । साथै, विश्वव्यापी परामर्शदाता कम्पनी फ्रस्ट एन्ड सुलिभानद्वारा प्रदान गरिने “बेस्ट प्राक्टिस अवार्ड २०१६” अन्तर्गतको “फाइनान्सियल इन्स्टिच्यूसन अफ द इयर – इन्स्योरेन्स कम्पनी”अवार्डसमेत प्राप्त गरेको छ ।