एजेन्सी । विश्वकप फुटबलको सेमिफाइनमा इंग्ल्यान्ड र क्रोएसियाबीचको खेल सुरु भएको छ । रसियाको राजधानी मस्कोस्थित लुज्हनिकी रंगशालामा सुरु भएको खेलमा दुबै टिम फाइनल प्रवेश गर्ने लक्ष्यमा छन् ।
५२ वर्षपछि इंग्ल्यान्ड फाइनलमा प्रवेश गर्ने लक्ष्यमा रहेको छ । यसअघि इंग्ल्यान्डले सन् १९६६ मा आफैले आयोजना गरेको विश्वकप फुटबलको उपाधि उचालेको थियो । इंग्ल्यान्डले विश्वकपको उपाधि एक पटक मात्रै उचालेको छ । इंग्ल्यान्ड दोस्रो पटक विश्वकपको फाइनलमा पुग्दै उपाधि उचाल्ने लक्ष्यमा छ ।
क्रोएसियाले भने सेमिफाइनलसम्मको मात्रै यात्रा अहिलेसम्म तय गरेको छ । सन् १९९८ मा भएको विश्वकप फुटबलमा क्रोएसिया सेमिफाइनलसम्म पुगेको थियो भने सेमिफाइनलमा फ्रान्ससँग २–१ गोलले पराजित हुदै उपाधि दौडबाट बाहिरिएको थियो । इंग्ल्यान्डलाई पराजित गर्दै फाइनलमा प्रवेश गरे क्रोएसियाले आफ्नो फुटबलमा इतिहास बनाउने छ ।
इंग्ल्यान्डले स्वीडेनलाई २–० गोलले पराजित गर्दै सेमिफाइनलमा प्रवेश गरेको हो । प्रिक्वाटरफाइनलमा भने कोलम्बियालाई पेनाल्टी सुटआउटमा ४–३ गोलले पराजित गरेको थियो । इग्ल्यान्ड समूह जि को उपविजेता टिम हो । इग्ल्यान्डले समूह चरणका खेलमा ट्युनिसियालाई २—१ र पानामालाई ६—१ गोल अन्तरले पराजित गरेको थियो भने समूह चरणको अन्तिम खेलमा बेल्जियमसँग १—० गोल अन्तरले पराजित भएको थियो ।
क्रोएसियाले क्वाटरफाइनलमा आयोजक राष्ट्र रसियालाई पेनाल्टी सुटआउटमा ४–३ गोलले पराजित गर्दै सेमिफाइनल यात्रा पार गरेको थियो । निर्धारित र थप गरिएको अतिरिक्त समयसम्म २–२ गोलको बराबरी भएपछि खेल पेनाल्टीबाट छिनोफानो भएको थियो । त्यस्तै, प्रिक्वाटरफाइनलमा क्राोएसियाले डेनमार्कलाई ३—२ गोलले पराजित गर्दै क्वाटरफाइनल प्रवेश गरेको थियो । क्रोएसियाले समूह चरणका खेलमा नाइजेरियालाई २—०, अर्जेन्टिनालाई ३—० र आइसल्यान्डलाई २—१ गोल अन्तरले परािजत गर्दै नकआउट चरणमा प्रवेश गरेको थियो ।