काटमाडौं । ललित मेमोरियल यु–१८ फुटबल च्याम्पियनसिपअन्तर्गत बुधबार भएको खेलमा थ्रीस्टार क्लब र फ्रेन्ड्स क्लबले जित हात पारेका छन् । थ्रीस्टारले मनाङलाई र फ्रेन्ड्सले सुदूरपश्चिमाञ्चललाई पराजित गरेका हुन् ।
ललितपुरस्थित एन्फा कम्प्लेक्सको खेल मैदानमा बुधबार भएको पहिलो खेलमा थ्रीस्टारले मनाङ मर्याङ्दी क्लबलाई १–० गोलअन्तरले पराजित गरेको हो । खेलको ४४ औं मिनेटमा थ्रीस्टारका लागि टिकाराज गुरुङले गोल गर्दै थ्रीस्टारलाई अग्रता दिलाएका थिए ।
पहिलो हाफमा १–० गोलअन्तरले पछि परेको मनाङले दोस्रो हाफमा पनि गोल फर्काउन सकेन ।
त्यस्तै, प्रतियोगिताअन्तर्गत बुधबारै भएको अर्को खेलमा फ्रेन्ड्स क्लबले सुदूरपश्चिमाञ्चललाई १–० गोलअन्तरले पराजित गरेको छ । खेलको १०औं मिनेटमा सन्देश न्यौपानेले गोल गर्दै फ्रेन्ड्स क्लबलाई अग्रता दिलाएका थिए । बाँकी समयमा दुबै टिमले गोल गर्न नसकेपछि फ्रेन्ड्सले सुदूरपश्चिमाञ्चललाई १–० गोलअन्तरले पराजित गरेको हो ।
प्रतियोगिताको विजेताले ३ लाख, उपविजेताले १ लाख ५० हजार प्राप्त गर्ने छन् । त्यस्तै, उत्कृष्ट फरवार्ड, मिड्फिल्डर, डिफेन्स, गोलकिपर र प्रशिक्षकले जनही १० हजार प्राप्त गर्ने छन् ।
