एजेन्सी । अमेरिकाका राष्ट्रपति डोनल्ड ट्रम्पसँग भेटवार्ता गर्न उत्तर कोरियाली शासक किम जोङ–उन आफ्ना सबैभन्दा खतरनाक र कुशल सुरक्षाकर्मीको जत्थाका साथ सिंगापुर पुगीसकेका छन् । उत्तर कोरियाली शासक किमका ती निजी बडिगार्डहरु यस पटक गरेर दोस्रो पटक विश्व सामु देखिएका हुन् ।
किमको सेनामा सहभागी रही रहेका री–योङ–गुकले उत्तर कोरियाका तानाशाहसँग अलग–अलग छ वटा सुरक्षा व्यवस्था रहेको बताएका छन् । उनीहरुलाई विश्वकै शक्तिशाली सुरक्षा व्यवस्था मध्येमा मानिन्छ ।
ती बडिगार्डहरु किमको बख्तरबन्द कारका साथ दौड्दै सुरक्षा प्रदान गर्ने गर्दछन् । उनीहरु सिंगापुरमा कालो पोसाक र टाई पहिरेर उत्तर कोरियाली शासक किमको कालो सिसायुक्त मर्सिडिजका साथ दौडी रहेको अवस्थामा देखिएका छन् ।
यसरी हुन्छ रनिङ बडिगार्डको छनोट
किमका बडिगार्डहरुलाई उनीहरुको शौन्दर्यता, शारिरिक सुगठन र सैन्य कौशलका आधारमा छनौट हुने गर्दछ । ती बडिगार्डहरुलाई सेनाका विभिन्न टुकडीहरुबाट छनोट गरेर कडा प्रशिक्षण पछि मात्रै शासक किमको सुरक्षाका लागि तैनाथ गरिदै आइएको बताइएको छ ।
पश्चिमा सञ्चार माध्यमहरुले यस अघि गत अप्रिलमा आयोजित कोरिया समिटका दौरान किमका रनिङ बडिगार्डहरु प्रति विश्व समुदायको ध्यान आकर्षित गरेका थिए । अहिले दोस्रो पटक पनि सिंगापुरमा हुन गइरहेको अमेरिका–उत्तर कोरियाबीचको ऐतिहासिक सम्मेलनको पूर्वसन्ध्यामा ती रनिङ बडिगार्डहरुको चर्चाले सामाजिक सञ्जाल तातेको छ ।