काठमाडौं । ३ जनाको ज्यान जाने गरी भएको भएको ३३ किलो सुन प्रकरण अझै सेलाएको छैन । गृह मन्त्रालयले गठन गरेको छानबिन समितिले यस घटनाको अनुसन्धान गरिररहेको छ । 
४५ दिनको म्याद पाएको टोलीले पक्राउ परेकामध्ये दोषी देखिएकालाई मोरङ प्रहरीबाट १८ गतेभित्र मुद्दा चलाउने तयारी गरेको छ । 

कसरी आयो ३३ किलो सुन ?
माघ ७ मा युएईबाट ३३ किलो सुन त्रिभुवन विमानस्थलमा आइपुगेको देखिएको अनुसन्धानमा संलग्न एक अधिकारी बताउँछन् । त्यो सुन युएईमा रहेका चुडामणि उप्रेती ‘गोरे’ का भाई रमेश उप्रेतीले पठाएको स्रोतले बाह्रखरीसँगको कुराकानीमा बतायो । 

स्रोतका अनुसार यूएईबाट आएको सुन विमानस्थलबाट बाहिर निकाल्ने, बाहरि निकालेको सुन जिम्मा लिने र त्यसको व्यवस्थापन गर्ने छुट्टाछुट्टै समूह रहेको छ । अनुसन्धानमा संलग्न स्रोतका अनुसार गोरेले ल्याएको सुन विमानस्थलबाट बाहिरिएको केहीबेरमा नै अर्कै व्यक्तिले ‘रिसिभ’ गरेका थिए । त्यसको व्यवस्थापन गर्ने जिम्मा पाएका थिए डाक्टर भनिने निर्मल मनाङेले । 
उनी नै गोरेको व्यवस्थापन हेर्ने मुख्य व्यक्ति भएको स्रोत बताउँछ । ३३ किलो सुन पनि विमानस्थलबाट बाहिरिएको केहीबेरमा हराएपछि पछिल्लो काण्ड उजागर भएको थियो । स्रोतका अनुसार दुईवर्षअघि पनि  गोरेको १४ किलो सुन यसैगरी हराएको पाइएको छ ।

को हुन डाक्टर भनिने निर्मल गुरुङ ?

स्रोतका अनुसार गोरेका सबैभन्दा विश्वासपात्र थिए निर्मल गुरुङ । गोरेले उनलाई कोड भाषा प्रयोग गर्दै ‘डाक्टर’ भनेर बोलाउँथे । गोरेले सुन ल्याउँदा प्रहरी, नेता, भन्सार, अध्यागमन सबैतिर सेटिङ मिलाउने काम तिनै डाक्टरले गर्ने गरेको स्रोत बताउँछ ।

उक्त ३३ किलो सुन नेपाल भित्रिने समयमा डाक्टर र गोरेबीचको सम्बन्धमा केही चिसोपना आएको थियो ।  यो हराएको ३३ किलो सुनसँग डाक्टरलाई पनि जोडेर हेरिएको प्रहरी स्रोत बताउँछ ।
 
३ महिनाअघि नै सनमले छाडेका थिए गोरेको काम 

यो घटनामा भरिया भनिएका सनम शाक्य खासमा गोरेका ‘अकाउन्टेन्ट’ थिए । उनले गोरेका सबै हिसाब–किताब राख्थे । सनमले ४ वर्ष गोरेसँग काम गरेको अनुसन्धानका क्रममा भेटिएको छ ।
तर ३३ किलो सुन आउनुअघि नै सनमले पनि गोरेलाई छाडिसकेको स्रोत बताउँछ । 

स्रोतका अनुसार ३३ किलो सुन हराउनुमा आफ्ना पूर्वकर्मचारीको हात रहेको हुन सक्ने भन्दै गोरेले सनमलाई यातना दिएको हुन सक्ने अनुमान छ । यातनाकै कारण सनमको मृत्यु भएको थियो ।

सनमको शव व्यवस्थापन गर्नै बार्गेनिङ !

फागुन १८ गते सनम शाक्यको शव फेला पर्यो धरानमा । तर प्रहरीले शव १९ गते विराटनगर पोखरीया कन्यामार्गमा सार्वजनिक गर्यो । गोरे समुहको यातनाबाट सनमको मुत्यु भएपछि उनको शव व्यवस्थापन गर्न अपराध महाशाखाकै केही प्रहरी अधिकृतसँग ५ करोडको बार्गेनिङ भएको स्रोतले जानकारी दियो ।

सनमको हत्यामा संलग्न मोहन काफ्ले, नरेन्द्र कार्की, टेकराज मल्ल, लाक्पा शेपा र मदन घिमिरेलाई पक्राउ गरी अनुसन्धान अघि बढाइएको छ । यी सबै गोरेका सहयोगी भएको प्रहरी स्रोतले जानकारी दियो ।

सयौं सिमकार्ड फेर्थे गोरे 
गोरे नजिकका स्रोतका अनुसार उनले प्रत्येकपल्ट नयाँ नम्बर बोक्थे । उनले फरक व्यक्तिलाई फरक नम्बरबाटै फोन गर्ने गर्थे  । गोरेका बुबा नेपाल प्रहरीका अवकाशप्राप्त हवल्दार हुन् । गोरेकी श्रीमतीले काठमाडौंमै व्यापार गर्ने स्रोत बताउँछ ।

घटनाको अनुसन्धान जारी

गृह मन्त्रालयबाट गठित समितिले यो प्रकरणको अनुसन्धान जारी राखेको जनाएको छ । हालसम्म यस घटनासँग जोडिएको आशंकामा ३० जना पक्राउ परिसकेका छन् । टोलीले प्रहरीका उच्च अधिकारीदेखि भन्सार, अध्यागमनका अधिकारीमाथि अनुसन्धान जारी राखेको छ ।

यस घटनासँग जोडिएका पात्र धेरै रहेको अनुसन्धानमा संलग्न एक प्रहरी अधिकृत बताउँछन् ।