काठमाडौं । आईसीसी विश्वकप छनोट क्रिकेटअन्तर्गत प्लेअफ खेलमा नेपालले पपुवा न्युगिनीसँग विहीबार (आज) प्रतिस्पर्धा गर्दैछ । समूह चरणमा निकै कमजोर प्रदर्शन गरेको पपुवा न्युगिनीका खेलाडीलाई रोके नेपाल एक दिवसीय मान्यता नजिक छ तर त्यति सजिलो भने छैन ।

पपुवा न्युगिनी निकै बलियो राष्ट्रका रुपमा चिनिन्छ । आईसीसी विश्व क्रिकेट लिग च्याम्पियनसिपको चौथो हुँदै विश्वकप छनोटमा स्थान बनाएको टिम हो । तर जारी विश्वकप छनोट प्रतियोगितामा भने राम्रो प्रदर्शन गर्न सकेन । समूह चरणमा एक खेल पनि जित हात नपारेको पपुवा न्युगिनीमाथि नेपालले जित हात पारे, एक दिवसीय मान्यता पाउने सम्भावना प्रवल छ ।

नेपालले पपुवा न्युगिनीलाई पराजित गरेको खण्डमा र अर्को प्ले अफमा हङकङलाई नेदरल्याण्डले पराजित गरेमा नेपालले एक दिवसीय मान्यता पाउनेछ ।

तर नेपाल पपुवा न्यनिगीसँग पराजित भएमा नेपालले इतिहास रच्ने सुनौलो अवसर गुमाउनेछ । नेपालले जितेमा र हङकङले नेदरल्याण्डलाई पराजित गरेमा नेपाल र हङकङ सातौँ स्थानको लागि प्रतिस्पर्धा गर्नेछ । त्यस्तै, सातौँ स्थानको विजेताले एक दिवसीय मान्यता पाउनेछ ।

पपुवा न्युगिनीका सबै खेलाडी राम्रो फर्ममा छन् । पपुवा न्युगिनीलाई पराजित गर्ने हो भने यी खेलाडीलाई नेपालले रोक्नुपर्ने हुन्छ ।
 
टोनी उरा
 

टोनी उरा पपुवा न्युगिनीका भरपर्दा ओपनिङ ब्याट्सम्यान हुन् । टोनी उरा कुनै पनि बेला आफ्नो टिमलाई जित दिलाउन सक्ने सक्षम खेलाडी हुन् । आयरल्याण्ड विरुद्धको खेलमा पपुवा न्युगिनीका लागि टोनी उराले उत्कृष्ट प्रदर्शन गर्दै १५१ रन बनाएका थिए । उनकै उत्कृष्ट प्रदर्शनपछि पपुवा न्युगिनीले २३५ रन बनाएको थियो ।

उनले आयरल्याण्ड विरुद्ध १० चौका र ६ छक्का प्रहार गर्दै शतक बनाएका थिए । यद्यपी पपुवा न्युगिनी आयरल्याण्डसँग ४ विकेटले पराजित भएको थियो ।
वेष्ट इन्डिजविरुद्ध पनि टोनी उराले ३७ रन बनाएभने अन्तिम खेलमा नेदरल्याण्डविरुद्ध ३ रनमा नै आउट भए । नेपालले खेल आफ्नो पक्षमा पार्नका लागि टोनी उरालाई सस्तैमा आउट गर्नुको विकल्प छैन ।

असद भाला
 

असद भाला पपुवा न्युगिनीका कप्तान हुन् । समूह चरणको खेलमा असद भालाले १११ रन बनाएका छन् । पहिलो र दोस्रो खेलमा चल्न नसकेपनि असदले वेष्ट इन्डिजविरुद्ध ५७ र नेदरल्याण्ड विरुद्ध ४४ रन बनाएका थिए ।

कप्तान असदले फष्र्ट क्लासमा ३ शतक र ३ अर्धशतक प्रहार गरेका छन् । त्यस्तै, लिष्ट ए मा उनले १ शतक र ७ अर्धशतक बनाएका छन् । देब्रेहाते ब्याट्सम्यान असद एक प्रभावशाली खेलाडी हुन् ।

सन् २०१५ मा भएको आईसीसी विश्व क्रिकेट लिग च्याम्पियनसिपअन्तर्गत दोस्रो चरणको पहिलो खेलमा नेपाल पपुवा न्युगिनीसँग पराजित हुँदा असद भालाले ८७ बनाएका थिए । यसकारण उनी विरुद्ध नेपाली खेलाडी सजक हुनुपर्ने हुन्छ ।
 
नोरमान भनुआ
 

नोरमान भनुवा मिडियम फास्ट बलर हुन् । भनुवा निकै लयमा रहेका अलराउण्डर हुन् । उनले जारी प्रतियोगितामा ८ विकेट लिई सकेका छन् भने ब्याटिङतर्फ ८० रन बनाएका छन् । उनले युएईविरुद्ध ४ विकेट लिएका थिए । त्यस्तै, आयरल्याण्ड विरुद्ध दोस्रो खेलमा १ विकेट मात्रै लिन सफल भएका भनुवाले तेस्रो खेलमा वेष्ट इन्डिज विरुद्ध पनि १ विकेट लिएका थिए । समूह चरणको अन्तिम खेलमा नेदरल्याण्ड विरुद्ध २ विकेट लिँदै भनुवाले ८ विकेट पुर्याएका थिए ।

ब्याटिङतर्फ पनि उनको प्रदर्शन निकै लोभलाग्दो छ । १० औं नम्बरमा ब्याटिङ गर्न आउने भनुवाले ४ खेलबाट ८० रन बनाएका छन् । पहिलो खेलमा युएई विरुद्ध २० रन बनाएका उनले दोस्रो खेलमा आयरल्याण्ड विरुद्ध १२ रन बनाए । तेस्रो खेलमा उनले वेष्ट इन्डिज विरुद्ध ३५ रन बनाएका थिए भने समूह चरणको अन्तिम खेलमा नेदरल्याण्ड विरुद्ध १३ रन बनाएका थिए ।

उत्कृष्ट लयमा रहेका भनुवालाई रोक्न नेपाली खेलाडीलाई चुनौती बनेको छ ।
 
एलिई नाओ
 

नेपालको निकै खराब ब्याटिङ हुने गरेको छ । विशेषगरी ओपनिङ जोडी टिक्न नसक्दा नेपाल धरापमा पर्ने गरेको छ । नेपाली ब्याट्सम्यानका लागि पपुवा न्युगिनीका एलिई नाओ मुख्य चुनौती बनेका छन् ।

एलिई नाओले ४ खेलबाट ६ विकेट लिईसकेका छन् । २४ वर्षीय नाओ राइटआर्म मिडियम फास्ट बलर हुन् । भनी मोरिया, लेगा सिएका, सेसी बाउ, महुरु दाई र कार्लस अमिनी जस्ता पपुवा न्युगिनीका खेलाडी नेपालको तगारो बन्न सक्छ ।
 
हेड टु हेडमा पपुवा न्युगिनी हावी
 

पपुवा न्युगिनी नेपालको नयाँ प्रतिद्वन्द्वी भने होइन । नेपाल र पपुवा न्युगिनीले अहिलेसम्म ३ पटक प्रतिस्पर्धा गरेका छन् । जसमा तीनै खेल पपुवा न्युगिनीले जितेको छ ।

यी दुई टिमबीच पहिलो पटक सन् २००५ मा विश्व क्रिकेट लिग डिभिजन टु छनोटमा प्रतिस्पर्धा भएको थियो । जुन खेलमा पपुवा न्युगिनीले नेपाललाई ७० रनको भारी अन्तरले पराजित गरेको थियो ।

यसपछि नेपाल र पपुवा न्युगिनीबीचको भेट सन् २०१५ नोभेम्बरमा भयो । आईसीसी विश्व क्रिकेट लिग च्याम्पियनसिपमा नेपालले पपुवा न्युगिनीसँग दुई खेल खेलेको थियो । जुन दुबै खेलमा नेपाल जित नजिक पुगेर पराजित भएको थियो ।

च्याम्पियनसिपअन्तर्गत दोस्रो चरणको पहिलो खेलमा २ विकेटले पराजित भएको नेपाल दोस्रो खेलमा पनि पपुवा न्युगिनीसँग ३ विकेटले पराजित भएको थियो ।

नेपालसामु विगतको हारको बदला लिँदै एक दिवसीय मान्यता पाउने ठूलो अवसर मिलेको छ । त्यसका लागि नेपालले उत्कृष्ट प्रदर्शन गर्दै जित हात पार्नु पर्ने हुन्छ ।

नेपालले जारी प्रतियोगिताको समूह चरणमा ३ खेलमा हार र एक खेलमा मात्रै जित हात पार्यो । पहिलो खेलमा आयोजक जिम्बावेसँग ११६ रनले पराजित भएको नेपाल दोस्रो खेलमा स्कटल्याण्डसँग ४ र तेस्रो खेलमा अफगानिस्तानसँग ६ विकेटले पराजित भएको थियो ।

समूह चरणको अन्तिम खेलमा हङकङमाथि ५ विकेटको शानदार जित हात पार्दै नेपालले एक दिवसीय मान्यता पाउनेलाई यथावत राखेको हो ।
 
ब्याटिङकै चिन्ता
 

नेपालले बुधबार जिम्बावेको वल्ड हरारियन्समा पपुवा न्युगिनी विरुद्ध कस्तो ब्याटिङ गर्ला ? सबैको चिन्ताको विषय बनेको छ ।

विश्वकप छनोटको पहिलो खेलमा जिम्बावे विरुद्ध पराजित भएपनि नेपालको ब्याटिङले केही आशा पलाएको थियो । जिम्बावेविरुद्ध २६४ रन बनाएको नेपालको त्यसपछिका खेलमा निराशाजनक ब्याटिङ प्रदर्शन रहेको छ । स्कटल्याण्ड र अफगानिस्तानसँग नेपाल हार्नुको मुख्य कारण पनि ब्याटिङ नै भएको थियो ।

स्कटल्याण्डविरुद्ध १४९ रनमै अलआउट भएको नेपाल अफगानिस्तानविरुद्ध पनि १९४ रनमै अलआउट भएको थियो । हङकङ विरुद्ध पनि नेपालका अनुभवि खेलाडी सस्तैमा समेटिएका थिए । तर सोमपाल कामी र युवा खेलाडी रोहिकुमार पौडेलले नेपालको शाख जोगाएका थिए ।

नेपालका ओपरन ब्याट्सम्यान दिलिप नाथ र उपकप्तान ज्ञानेन्द्र मल्ल चल्न सकिरहेका छैनन् । शरद भेषवाकर घाइते हुँदै अफगानिस्तान र हङकङबीचको खेल गुमाएका थिए भने पछिल्लो तीन खेलमा दीपेन्द्रसिंह ऐरी, आरिफ शेख चल्न सकिरहेका छैनन् ।