काठमाडौं । अमेरिकामा सरकारी कामकाज ठप्प भएपछि शनिबार लाखौँ कर्मचारीलाई अहिलेका लागि काममा नआउन अनुरोध गरिएको बीबीसीले जनाएको छ ।
अमेरिकी सिनेटमा सत्ता पक्ष र विपक्षका बीच गैर कानूनी आप्रवासीको मुद्दामा भएको विवादका कारण सरकारी बजेटको विधेयक स्वीकृत नहुँदा अधिकांश सरकारी काम बन्द भएका हुन् ।
रिपब्लिकन र डेमोक्रेटिक पार्टीले आ–आफ्नो अडान नछोड्ने बताएपछि यो समस्या समाधान हुन केही समय लाग्न सक्ने बताइएको छ । राहदानी कार्यालय, स्वास्थ्य विभाग, आयकर विभाग र सेनासम्बन्धी कार्यालय समेत बन्द भएको बताइएको छ । त्यसबाहेक सुरक्षाकर्मीका तर्फबाट सैन्य सीमा सुरक्षा बल, विमानस्थल र सरकारी चिकित्सकहरुले भने सेवा जारी राख्ने बताइएको छ ।
यसका लागि राष्ट्रपति डोनाल्ड ट्रम्पले भने विपक्षी डेमोक्रेटिक पार्टीमाथि आरोप लगाएका छन् । वाइट हाउसले पनि डेमोक्रेटिक पार्टीलाई अनावश्यक मागका लागि नागरिकहरुलाई दुःख दिएको भन्दै कडा आलोचना गरिरहेको छ । बाल्यकालमै आमाबुवासँग अमेरिका आएका ८ लाख आप्रवासीहरुलाई अमेरिकामै काम गर्ने छुट दिने प्रावधान जारी राख्नुपर्ने डेमोक्रेटिकहरुको माग रहेको छ ।
तर पछिल्लो सेप्टेम्बर मात्र ट्रम्पले आप्रवासी सम्बन्धी सो कार्यक्रमको अन्त्य गराउने घोषणा गरेका थिए । कांग्रेसलाई आगामी मार्चसम्म यसको विकल्प खोज्न उनले आग्रह गरेका थिए ।
रिपब्लिकन सिनेटले यस मुद्दालाई सरकारी बजेटको विदेयकसँग नजोड्ने र सिनेटमै अलग बसेर यसबारे छलफल गर्ने प्रस्ताव अघि सारेका थिए ।
यसै मुद्दामा १६ फेब्रुअरीसम्मको सरकारी बजेट स्वीकृत भइसकेको भएपनि सिनेटमा डेमोक्रेटिक पार्टीका अधिकांश सदस्यले यसप्रति असहमति जनाएपछि नयाँ विवाद उत्पन्न भएको हो ।
यसअघि २०१३ मा पनि अमेरिकी सरकारी कार्यलयहरु बन्द भएका थिए । त्यसबेला १६ दिनसम्म सरकारी कामकाज ठप्प हुँदा सरकारलाई २ बिलियन अमेरिकन डलर नोक्सान भएको थियो ।