काठमाडौँ । जुडोको राष्ट्रिय टिमको प्रशिक्षण सुरु भएको छ  ।  सातदोबाटोस्थित अन्तर्रा्ष्ट्रिय खेलकुद परिसरमा बुधबारबाट राष्ट्रिय टिमको प्रशिक्षण सुरु भएको हो ।

नेपाली राष्ट्रिय टिममा परेका समान १४–१४ पुरुष र महिला खेलाडीलाई प्रशिक्षण दिन सुरु गरिएको हो । गत पुस अन्तिम साता सातदोबाटोमा सम्पन्न राखेप च्याम्पियनसिपअन्तर्गत १५ औं राष्ट्रिय जुडो प्रतियोगिताको आ–आफ्नो तौलसमूहमा पहिलो र दोस्रो हुने खेलाडीलाई प्रशिक्षणमा राखिएको नेपाल जुडो संघका महासचिव धर्मकुमार श्रेष्ठले जानकारी दिए ।

नेपाली टिमलाई अन्तर्रा्ष्ट्रिय जुडो महासंघ (आईजेएफ) बाट आएका जुडो प्रशिक्षक डान तेलर्काले प्रशिक्षण गराईरहेका छन्  । आसन्न दक्षिण एसियाली, एसियाली र ओलम्पिक खेलकुदको तयारीलाई ध्यानमा राखि जुडो संघले रोमानियाका छैटौं डान तेलर्कालाई प्रशिक्षक राखेको हो । अन्तर्राष्ट्रिय प्रशिक्षकका लागि जुडो संघले आईजेएफमा पहल गरेपछि  आईजेएफले उनलाई नेपाल पठाएको हो ।