एजेन्सी । डेनमार्कले आगामी बर्ष रुसमा हुने फिफा विश्वकप फुटबलमा स्थान बनाएको छ । विश्वकप छनोट अन्तर्गत मंगलबार राति युरोपियन क्षेत्रको प्ले अफको दोस्रो लेगमा रिपब्लिक आयरल्याण्डलाई ५ – १ ले पराजित गर्दै डेनमार्क विश्वकपमा पुगेको हो ।
रिपब्लिक आयरल्याण्डको घरेलु मैदानमा सुरुवाती अग्रता उल्टाएर डेनमार्कले जित निकालेको हो । डेनमार्कको लागि क्रिष्टियन एरिक्सनले ह्याट्रिक गरे । त्यस्तै आन्द्रीयस क्रिस्टेनसेन र निकलास बेण्डनरले समान एक एक गोल गरे । रिपब्लिक आयरल्याण्डका शेन डुफ्फेले एक गोल फर्काए । यो जितसँगै डेनमार्कले समग्रमा ५ – १ को जितसहित रुसको यात्रा तय गर्यो । दुई टोलीबीचको पहिलो लेग गोलरहित बराबरीमा सकिएको थियो ।
अभिभा स्टेडियममा सुरुवाती अग्रता घरेलु टोलीले लिएको थियो । खेलको छैटौं मिनेटमा नै शेनले गोल गर्दै रिपब्लिक आयरल्याण्डलाई सुरुवाती अग्रता दिलाएका थिए । तर, खेलको २९ औं मिनेटमा क्रिस्टेनसेनले गोल गर्दै डेनमार्कलाई खेलमा फर्काए । खेलको ३२ औं मिनेटमा एरिक्सनले गोल गरेपछि पहिलो हाफमा डेनमार्क २ – १ ले अघि रह्यो ।
दोस्रो हाफमा डेनमार्क निकै आक्रामक बन्यो । खेलको ६३ औं मिनेटमा एरिक्सनले व्यक्तिगत दोस्रो गोल गर्दै डेनमार्कलाई ३ – १ को अग्रता दिलाए । खेलको ७४ मिनेटमा एरिक्सनले ह्याट्रिक पुरा गर्दा डेनमार्क ४ – १ ले अघि रह्यो । त्यसपछि खेलको ९० औं मिनेटमा निकलासले पेनाल्टीमा गोल गरेपछि डेनमार्कले ५ – १ को फराकिलो जित निकाल्यो ।
यो जितपछि सन् २०१४ को विश्वकपमा छनोट हुन् नसकेको डेनमार्कले सन् २०१८ को विश्वकपमा भने स्थान पक्का गर्यो । डेनमार्क विश्वकपमा छनोट हुने ३० औं राष्ट्र हो । यता, रिपब्लिक आयरल्याण्डले भने अन्तिम समयमा आएर विश्वकपमा स्थान बनाउन सकेन । रिपब्लिक आयरल्याण्ड पछिल्लो ४ विश्वकपमा छनोट हुन् सकेको छैन ।