काठमाडौं । रामबाबु–ज्ञानु सामाजिक सेवा पुरस्कार शनिबार प्रदान गरिएको छ । वरिष्ठ संस्कृतिविद सत्यमोहन जोशीको प्रमुख आतिथ्यमा  तीन पुरस्कार र सम्मानपत्र प्रदान गरिएको थियो ।

रामबाबु–ज्ञानु सामाजिक सेवा पुरस्कार (रु. दुई लाख र सम्मानपत्र) – महिला तथा वृद्ध सेवा केन्द्र, भीमदत्त न.पा., कञ्चनपुर तथा यसका संस्थापक शारदा देवी चन्दलाई प्रदान गरिएको थियो भने रामबाबु–ज्ञानु समाज सेवी पुरस्कार (रु. एक लाख र सम्मानपत्र) – द्वन्द्व पीडित तथा अपाङ्ग समाज, सलम्बुटार, शङ्खरापुर नगरपालिका, काठमाडौं तथा यसका संस्थापक युवराज थापा र रामबाबु–ज्ञानु समाज सेवी पुरस्कार (रु. एक लाख र सम्मानपत्र) – बेबी लाइफ होम, भत्केपाटी, कीर्तिपुर, काठमाडौं र यसका संस्थापकद्वय राज कुमार पुन र उमा राई गुरुङ्गलाई प्रदान गरिएको थियो ।

स्वयं सेवाको भावनाले नेपालीहरुको हितमा उदाहरणीय योगदान गरेका व्यक्ति वा सामाजिक संस्थाको योगदानको सम्मान गर्ने उद्देश्य राखी रामबाबु ज्ञानु सामाजिक सेवा पुरस्कार कोषको स्थापना २०७० सालमा गरिएको थियो । संरक्षक रामबाबु नेपाल र ज्ञानु नेपालले रु. बीस लाखको अक्षयकोष राखी शुरु गरेको कोषमा हाल रु. २९ लाख रहेको छ । कोषमा रहेको रकममा आउने ब्याज तथा संरक्षकद्वयले उपलब्ध गराउने थप रकमबाट २०७१ देखि पुरस्कार प्रदान गरिंदै आएको छ ।