खेल

सिंगापुरविरुद्ध नेपालको जवाफी ब्याटिङ, पहिलो विकेट पतन 

काठमाडौं । मलेसियामा जारी एसीसी यू–१९ एसिया कप छनोट अन्तर्गत सिंगापुरले दिएको ६८ रनको लक्ष्यसहित जवाफी ब्याटिङ गरिरहेको नेपालले पहिलो विकेट गुमाएको छ । 

नेपालले पहिलो विकेटको रुपमा ओपनर आसिफ शेखलाई गुमाएको हो ।  मलेसियाको क्लब अमान ओभलमा आसिफ ६  रन बनाएर पेभेलियन फर्किए । उनलाई सिंगापुरका अभी दिक्षितले आउट गरे । 

आसिफलाई सस्तैमा गुमाएपनि  नेपालले ५ ओभरको समाप्तिमा १ विकेट गुमाएर २९  रन जोडेको छ । नेपाललाई जितका लागि अब मात्र ३९ रनको आवश्यकता छ । नेपालका अर्का ओपनर सन्दिप सुनार १० रनमा अविजित रह्द्दा, अनिल कुमार साह पनि ९ रनमा अविजित छन् ।

यसअघि टस जितेर पहिले ब्याटिङ गरेको सिंगापुर २८ ओभर ३ बलमा अलआउट हुँदै ६७ रनमा समेटिएको थियो ।  सिंगापुरका लागि सिधान्त र अर्यमान सुनीलले समान २० – २० रन तथा रोहण रङराजनले ११ रन बनाउनु बाहेक अन्य ब्याट्सम्यानले उलेख्य रन जोड्न सकेनन्  । 

सिंगापुरलाई सस्तैमा समेट्न नेपालका पवन सराफ एक्लैले ६ विकेट लिए । पवनले ८ ओभरमा ४ मदनसहित मात्र १२ रन खर्चिएका थिए । यस्तै नेपालका लागि किशोर महतोले २ तथा कप्तान दिपेन्द्र सिंह एरीले १ विकेट लिए ।

अघिल्ला दुई खेलमा जित निकाल्दै सेमिफाइनलमा पुगिसकेको नेपाल आज सिंगापुरलाई पराजित गर्दै समूह बिजेता बन्न चाहन्छ । समूह ए को नेपाल दुई खेलमा ४ अंक जोडेर समूहको शीर्ष स्थानमा छ । 

यता, सिंगापुर पनि दुई खेलमा अपराजित छ । सिंगापुरको पनि ४ अंक छ तर, नेट रनरेटको आधारमा सिंगापुर नेपाल भन्दा पछि छ ।  छनोटको समूह बी मा चीन, मलेसिया, हङकङ र म्यानमार छन् । फाइनलमा पुग्ने दुई टोली एसिया कपको लागि छनोट हुनेछन् ।
 

तपाईंको मत