काठमाडौं । साउदी अरबको श्रम तथा सामाजिक विकास मन्त्रालयले महिला शेल्टरमा रहेका १३९२ घरेलु महिला कामदार साउदी छाडेर स्वदेश फर्केको जनाएको छ । ‘शवाल’को ‘हिजरी’ महिनामा उनीहरूले आश्रयस्थल छाडेको मन्त्रालयको भनाइ छ । 

औपचारिक प्रक्रिया पूरा गरेपछि शेल्टरमा रहेका अन्य घरेलु महिला कामदारलाई स्वदेश फर्काउने तयारी भइरहेको पनि मन्त्रालयको भनाइ छ । आश्रयस्थलमा राखिएका महिलाहरूको पूर्ण सुरक्षा प्रदान गरिने र घर पठाउनु अघि पूर्ण अधिकार प्राप्त गर्न सहयोग गर्ने मन्त्रालयको भनाइ छ । 

मन्त्रालयका प्रवक्ता खालिद अबा अल–खेइलले भने, “घरेलु कामदारका लागि कुनै पनि विवादको मामिलामा एउटा पक्षले अर्को पक्षको विरुद्ध घरेलु श्रम मध्यस्तता समिति अघि आधिकारिक गुनासो दर्ता गर्नुपर्छ भन्ने निर्धारण गरिएको छ ।”

महिला श्रमिकको आश्रयस्थल (शेल्टर) मा रोजगारदाताको घरबाट भागेका र समस्यामा परेका महिला कामदारलाई राखिने गरिएको छ । तिनीहरूलाई रोजगारदातासँगको मुद्दा किनारा लगाएपछि स्वदेश फर्काउने गरिएको अरबन्युजले लेखेको छ ।