काठमाडौं । ओलम्पियन पौडीबाज गौरिका सिंहले २० औं राष्ट्रिय पौडी प्रतियोगिताको अन्तिम दिन शुक्रबार तीन राष्ट्रिय किर्तिमान बनाएकी छिन् । सातदोबाटोमा बिहिबार सुरु राष्ट्रिय पौडीको पहिलो दिन पनि गौरिकाले २ राष्ट्रिय किर्तिमान बनाएकी थिइन् ।

सातदोबाटोस्थित अन्तर्रा्ष्ट्रिय पौडी परिसरमा सम्पन्न प्रतियोगिताको दोस्रो दिन त्रिभुवन आर्मी क्लबकी गौरिकाले महिला सय मिटर फ्रिस्टायल,  सय मिटर बटरफ्लाई र ५० मिटर फ्रिस्टाइलमा कीर्तिमानसहित स्वर्ण जितेकी हुन् । यस्तै गौरिका,ओशिना भारती,दिलिप थापा मगर र अनुभव सुब्बासहित टिम आर्मीले चार गुणा सय मिटर मिक्स फ्रि रिलेमा पनि स्वर्ण हात पारेका छन् ।

योसँगै गौरिकाले २० औं राष्ट्रिय पौडीमा पाँच राष्ट्रिय किर्तिमानसहित सहभागी जनाएको सबै ६ स्पर्धामा स्वर्ण जितेकी छिन् । पहिलो दिन गौरिकाले ५० मिटर बटरफ्लाई र २ सय मिटर फ्रिस्टाइल स्पर्धामा राष्ट्रिय किर्तिमान बनाएकी थिइन् ।

गत वर्ष रियो ओलम्पिकमा सबैभन्दा कान्छी खेलाडी बनेकी गौरिकाले अन्तिम दिन सय मिटर फ्रिस्टायलको हिट्स चरणमा  १ मिनेट ७९ सकेन्डको नयाँ राष्ट्रिय किर्तिमान कायम गरिन् । फाइनल चरणमा १ मिनेट ०२.०३ सकेन्डको समयका साथ स्वर्ण जितेकी गौरिकाले आफ्नै नाममा रहेको किर्तिमान भङ्ग गरेकी हुन् ।

गौरिकाले गत बर्ष दुबईमा भएको आइरिस ओपन च्याम्पियनसिपमा १ मिनेट ०१.७८ सकेन्डको किर्तिमान बनाएकी थिइन् । यो स्पर्धामा मध्यमाञ्चलकी टिसा शाक्यले रजत र एपीएफकी डुआना लामाले कास्य जितिन् ।

शुक्रबार नै भएको सय मिटर बटरफ्लाईमा गौरिकाले १ मिनेट ०७.६९ सेकेन्डको समय निकाल्दै किर्तिमानसहित स्वर्ण जितिन्  । गौरिकाले गत बर्ष भारतमा सम्पन्न १२ औं दक्षिण एसियाली खेलकुद (साग) मा बनाएको १ मिनेट १०.९४ सेकेन्डको आफ्नै किर्तिमान भङ्ग गरेकी हुन् । यो स्पर्धामा एपीएफकी डुआना लामाले रजत र मध्यमाञ्चलकी लुमाना शाक्यले कास्य जितिन् ।

साग खेलकुदमा एक रजत र तीन कांस्यपदक जितेकी गौरिकाले महिला अन्तिम दिन ५० मिटर फ्रिस्टाइलको हिट्स चरणमा  २८.०९ सेकेन्डको समय निकाल्दै नयाँ राष्ट्रिय किर्तिमान कायम गरिन्  । फाइनल चरणमा २८.५० सकेन्डको समयसहित स्वर्ण जितेकी गौरिकाले भारतमा सम्पन्न सागमा सोफिया शाहले बनाएकी २८.८५ सकेन्डको किर्तिमान भङ्ग गरेकी हुन् ।

नेपाल पौडी संघले आयोजना गरेको २० औं राष्ट्रिय पौडीको अन्तिम दिन एपीएफका सुभम श्रेष्ठले दुई राष्ट्रिय किर्तिमान बनाए । पहिलो दिन एक राष्ट्रिय किर्तिमान बनाएका सुभमले दोस्रो दिन सय मिटर ब्रेष्टस्ट्रोक र ५० मिटर ब्रेष्टस्ट्रोकमा किर्तिमानसहित स्वर्ण जिते ।

एक सय मिटर ब्रेष्टस्ट्रोकको फाइनल चरणमा १ मिनेट ११.२४ सकेन्डको राष्ट्रिय किर्तिमानसहित सुभमले स्वर्ण जितेका हुन्  । सुभमले गत महिना फिना विश्व पौडी च्याम्पियनसिपमा आफ्नै नाममा रहेको १ मिनेट ११.३४ सकेन्डको किर्तिमान तोडेका हुन्  । यस स्पर्धामा मध्यमाञ्चलका किरण कार्कीले रजत र बेदग्य राज जोशीले कास्य पदक जिते ।

यस्तै सुभमले ५० मिटर ब्रेष्टस्ट्रोकको हिट्स चरणमा ३२.४० सकेन्डको समयसहित राष्ट्रिय किर्तिमान बनाए । फाइनल चरणमा ३२.८२ सकेन्डसहित स्वर्ण जितेका सुभमले किरण कार्कीको नाममा रहेको ३२.४५ सकेन्डको किर्तिमान तोडेका हुन् । यो स्पर्धामा किरणले रजत र सायद हाम्जा शाहले कास्य जिते ।

राष्ट्रिय पौडीको अन्तिम दिन आर्मीका अनुभव सुब्बाले पुरुष सय मिटर फ्रिस्टाइल, सय मिटर ब्याकस्ट्रोक, सय मिटर बटरफ्लाई  र २ सय मिटर इन्डीभिजुअल मिड्लेमा स्वर्ण जित्दा एपीएफकी डुआना लामाले महिला २ सय मिटर इन्डीभिजुअल मिड्लेमा स्वर्ण पाइन् । यस्तै महिला सय मिटर ब्याकस्ट्रोकमा पश्चिमाञ्चलकी समिरा सोभा थापाले स्वर्ण, महिला सय मिटर ब्रेष्टस्ट्रोकमा  मध्यमाञ्चलकी टिसा शाक्यले स्वर्ण र ५० मिटर फ्रिस्टाइलमा मध्यमाञ्चलका एलेक्जेन्डर शाहले स्वर्ण जिते ।