काठमाडौं । ‘बाहुबली’ बनेका प्रभास दर्शकका मनमा छाइरहेका छन् । अब फ्यानलाई उनको आगामी चलचित्र ‘साहो’ को तीव्र पर्खाइ छ । जसको टिजर सार्वजनिक भइसकेको छ । प्रभाससँग चलचित्रमा को हिरोइन राख्ने भन्ने बारे खोजी भइरहेको थियो ।
चलचित्र निर्माण पक्षले अभिनेत्री श्रद्धा कपुरका नाम निश्चित गरेका छन् । चलचित्रका लागि अनुष्का शेट्टी र श्रद्धा कपुरको नाम चर्चामा थियो । खबरका अनुसार अनुष्काको तौलका कारण उनी चलचित्रमा फिट हुन सकिनन् ।
चलचित्रका निर्माताले ‘मुम्बई मिरर’ सँग कुराकानी गर्दै भने, “श्रद्धा यो भूमिकाका लागि उचित छिन् । उनलाई साइन गराएर हामी खुसी छौँ । ‘साहो’ प्रभासको पहिलो हिन्दी फिल्म हो । यो हामी सबैका लागि निकै विशेष हो ।”
चलचित्र तीन भाषामा छायांकन गरिनेछ । हिन्दी, तमिल र तेलुगु । प्रभासले चलचित्रको सुटिङ अगस्टबाट सुरु गरेका छन् ।
हैदराबादको रामोजी फिल्म सिटीमा चलचित्रको ठूलो सेट निर्माण गरिएको छ । चलचित्रको केही भाग आबुधाबी र रोमानियामा पनि सुट गरिनेछ । चलचित्रको संगीत शंकर–एहसान–लोयले दिनेछन् । अमिताभ भट्टाचार्यले चलचित्रका लागि गीत लेख्नेछन् ।