काठमाडौं । विभागीय टोली त्रिभुवन आर्मी क्लबले चौथो संस्करणको प्रधानमन्त्री कप राष्ट्रिय पुरुष क्रिकेटको उपाधि जितेको छ ।

शनिबार त्रिवि क्रिकेट मैदानमा भएको फाइनल खेलमा अर्को विभागीय टोली एपीएफ क्लबलाई ३४ रनले पराजित गर्दै आर्मीले उपाधि जितेको हो ।

आर्मीले दिएको २१२ रनको लक्ष्य पछ्याएको एपीएफले ४१.३ ओभरमा सबै विकेट गुमाउँदै १७८ रन मात्र जोड्न सक्यो । दोस्रो संस्करणको पीएम कपमा एपीएफले आर्मीलाई पराजित गर्दै उपाधि जितेको थियो । यस संस्करणमा आर्मीले उक्त हारको बदलासमेत लिएको छ ।

हरेक संस्करणमा फाइनल पुगेको आर्मीको यो दोस्रो उपाधि हो । पहिलो संस्करणमा नेपाल पुलिस क्लबसँग आर्मीले ट्रफी बाँडेको थियो । यसअघि, तेस्रो संस्करणमा आर्मी पुलिससँग नै पराजित भएको थियो ।

फाइनलमा एपीएफका लागि ओपनर ब्याट्सम्यान आसिफ शेखले अर्धशतकीय पारी खेले पनि टोलीको जितका लागि पर्याप्त हुन सकेन । उनले खराब सुरुवात गरेको एपीएफका लागि ७१ बलको सामना गर्दै आठ चौका र एक छक्काको मद्दतमा ६१ रन बनाए ।

एपीएफको २१ रन हुँदा पहिलो विकेटको रुपमा ओपनर ब्याट्सम्यान सुवास खकुरेललाई चौथो ओभरको पहिलो बलमा गुमाएको थियो । सोही ओभरको दोस्रो बलमा नै कप्तान शरद भेषावकर गोल्डेन डकआउट हुन पुगे । त्यसपछि शंकर रानाले आसिफसँग ७१ रनको साझेदारी गर्दै टोलीको पारी उकास्ने प्रयास गरेका थिए । तर, राना २१ रनमा खेल्दै गर्दा शाहब आलमको बलमा कट बिहाइन्ड हुँदै विनोद भण्डारीको हातबाट क्याचआउट हुँदै पेभिलियन फर्किए । उनले ४७ बलको समना गर्दै तीन चौकासहित २१ रन जोडे । सन्दीप जोराले २९ रनको योगदान दिए । उनले ३७ बलमा एक चौका र एक छक्का प्रहार गरेका थिए । यस्तै, सुमित महर्जनले १९ रनको योगदान दिँदा भुवन कार्कीले नौ, अमर रौटेला एक, कमल ऐरी दुई र अभिनाश बोहरा शून्य रनमा पेभिलियन फर्किए ।

एपीएफलाई सस्तैमा समेट्न बलिङतर्फ आर्मीका लागि जितेन्द्र मुखिया, शाहब आलम र बिक्रम सोबले समान तीन/तीन विकेट लिए । जितेन्द्रले नौ ओभरमा एक मेडन राख्दै ३७ रन खर्चेर तीन विकेट लिएका हुन् । त्यस्तै, बिक्रमले समान ओभरमा २७ रन खर्चंदै तीन विकेट लिए । आलमले ९.३ ओभरमा २८ रन खर्चंदै तीन विकेट लिए । सुशन भारीले एक विकेट लिए ।

यसअघि, हरि चौहानको अर्धशतकको मद्दतमा आर्मीले एपीएफलाई उपाधिका लागि २१२ रनको लक्ष्य दिएको थियो । टस हारेर पहिले ब्याटिङ गरेको आर्मीले निर्धारित ५० ओभरमा नौ विकेट गुमाउँदै २११ रन जोडेको थियो ।

आर्मीका लागि वान डाउनमा मैदान प्रवेश गरेका हरिले अर्धशतकीय पारी खेले । उनले १०२ बलमा ६ चौका प्रहार गर्दै टोलीका लागि सर्वाधिक ५८ रन बनाए । ओपनर गएका सुशन भारी नवौँ ओभरको अन्तिम बलमा पेभिलियन फर्किएपछि उनको स्थानमा हरि मैदान प्रवेश गरेका थिए । उनी अभिनाश बोहराले फालेको ४७औँ ओभरको पहिलो बलमा कमल ऐरीको हातबाट क्याचआउट हुन पुगेका थिए । भारीले आर्मीका लागि १३ रनको योगदान दिए ।

त्यस्तै, दोस्रो विकेटको रुपमा आर्मीले अनित मण्डललाई गुमाएको थियो । टोलीको ३२ रन हुँदा दशौँ ओभरको पहिलो बलमा मण्डल आर्मीको दोस्रो विकेटको रुपमा पेभिलियन फर्किएका थिए । ११ रनमा खेलिरहेका मण्डल अभिनाश बोहराको बलमा आसिफ शेखको हतबाट क्याचआउट भएका थिए ।

तेस्रो विकेटको रुपमा भीम सार्की सात रनमा आउट हुन पुगे । त्यसपछि मैदान आएका रोशित पौडेलले १३ रनको योगदान दिए । उनी भुवन कार्कीको बलमा लामो सट खेल्ने चक्करमा अमर रौटेलाको हातबाट क्याचआउट भएका थिए । कप्तान विनोद भण्डारी सात रनमा एलबीडब्लु आउट हुँदा उनको स्थानमा राजेश पुलामी मैदान प्रवेश गरेका थिए । पुलामीले हरिसँग ४४ रनको साझेदारी गरे । किशोर महतोको बलमा बोल्ड आउट हुन पुगेका पुलामीले २९ बलमा दुई चौका र एक छक्का प्रहार गर्दै २८ रनको योगदान दिएका थिए । नौ बल खेलेका लोकश बमले दुई चौकासहित १५ रन जोड्दा बिक्रम सोबले ११ रन जोडे ।

साहब आलमले रनको योगदान दिए । उनले १४ बलमा दु्ई चौका र एक छक्का प्रहार गर्दै २५ रनको अविजित पारी खेले । त्यस्तै, जितेन्द्र मुखिया शून्य रनमा अविजित रहे ।

बलिङतर्फ एपीएफका लागि मेडियम फास्ट बलर अभिनाश बोहराले सर्वाधिक चार विकेट लिए । उनले १० ओभर बलिङ गर्दा दुई ओभर मेडन फाल्दै २५ रन खर्चेर चार विकेट लिएका हुन् । त्यस्तै, किशोर महतोले दुई तथा कमल ऐरी, भुवन कार्की र कप्तान शरद भेषावकरले एक/एक विकेट लिएका थिए ।

तस्बिरहरुः सुनील प्रधान/बाह्रखरी ।