एजेन्सी । इटालियन सिरी ए फुटबल अन्तर्गत बुधबार राति विभिन्न सात खेल हुँदैछन् । ती खेलमध्ये शीर्ष स्थानको युभेन्ट्सले सासुलोसँग प्रतिस्पर्धा गर्दैछ । सासुलोको घरेलु मैदानमा हुने खेल नेपाली समय अनुसार राति १:३० मा सुरु हुनेछ । आजको खेलमा जित निकाल्दै युभेन्ट्सलाई शीर्ष स्थानमा अग्रता बनाउने अवसर छ । 

लिगमा ३२ खेल खेलेको युभेन्ट्स ७६ अंक सहित शीर्ष स्थानमा छ । एक खेल बढी खेलेको एटलान्टा ७० अंकसहित दोस्रो स्थानमा छ । आजको खेलमा जितेमा  युभेन्ट्स शीर्ष स्थानमा ९ अंकको अग्रता बनाउनेछ । उता सासुलोलाई आजको खेलमा जित निकाल्दै शीर्ष आठमा बलियो बन्ने मौका छ । 

आज नै हुने अर्को खेलमा नापोलीले बोलोगानासँग प्रतिस्पर्धा गर्दैछ । खेल नेपाली समय अनुसार ११:१५ बाट सुरु हुनेछ । सोही समयमा एसी मिलानले पार्मासँग प्रतिस्पर्धा गर्दा साम्पोर्डियाले काल्गिरीसँग प्रतिपर्धा गर्नेछ । त्यस्तै चौथो स्थानको लाजियोले उडिनेसासँग प्रतिस्पर्धा गर्दैछ । खेल नेपाली समयअनुसार राति १:३० मा सुरु हुनेछ । यसै समयमा हुने अर्को खेलमा एएस रोमाले भेरोनासँग प्रतिस्पर्धा गर्दैछ ।